Në ditën e dytë të vizitës së tij në Miçigan, kryebashkiaku i Tiranës, Erion Veliaj, ishte i ftuar nderi në ceremoninë e diplomimit të 3 mijë studentëve të “Grand Valley State University”, ku u vlerësua me titullin “Doctor Honoris Causa”, për kontributin e tij në shërbimet publike.
Titulli iu dorëzua nga vetë Presidenti i “Grand Valley State University”, i cili e vlerësoi Veliajn si shembullin e një historie suksesi mes studentëve që kanë mbaruar studimet në “Grand Valley State University”.
Thomas J. Haas, Presidenti i “Grand Valley State University”, tha: “Ju tashmë keni përmirësuar infrastrukturën e qytetit, keni ulur ndotjen e ajrit, keni përdorur teknologjinë për të përmirësuar cilësinë e jetës për qytetarët tuaj. Stili juaj energjik i lidershipit ka marrë një mbështeje të madhe nga qytetarët. ‘Grand Valley State University’ mbushet me krenari nga suksesi juaj. Me autoritetin që më është dhënë nga bordi i drejtuesve, ju jap titullin ‘Doctor Honoris Causa në Shërbimet Publike’, me të gjitha të drejtat dhe privilegjet që gëzon. Urime”.
Kryebashkiaku Veliaj ishte një nga tre të përzgjedhurit për të përshëndetur të diplomuarit e rinj në universitetin ku ai vetë kreu studimet e larta. Veliaj falënderoi “Grand Valley State University” për mundësinë që i dha për të studiuar, dhe veçanërisht për titullin e nderit, ndërsa rrëfeu rrugën e vështirë për të mbërritur në auditoret e këtij universiteti deri te vendimi për të lënë Amerikën për Shqipërinë.
“Shumë studentë vendosën të qëndrojnë në SHBA dhe pyetja ime ishte: Duhet të bëhem një motor në një makinë të vogël të fuqishme apo duhet të bëhem kaçavida në një makineri gjigante si Shtetet e Bashkuara. Ndaj mora vendimin që të kthehesha dhe nuk ishte një vendim i lehtë, por ishte vendimi më i mirë që kam bërë ndonjëherë”, tha Veliaj.
Veliaj iu drejtua studentëve edhe me një mesazh: “Ekziston një sëmundje për të cilën nuk ka kurë: cinizmi, ata që thonë “jo”, që thonë se “nuk mund të bëhet”. Unë mendoj se kjo është absolutisht e gabuar. Nëse ti jeton në këtë vend, ky është vendi që dërgoi njeriun në hënë, ky është vendi që zgjodhi një afro-amerikan për President, atëherë kur askush nuk e mendonte që kjo ishte e mundur. Ndaj, këshilla ime është: nuk ka rëndësi se çfarë thonë njerëzit, mos u bëni me cinikët, mos u bëni idhnakë, bëhuni entuziastë”.
Top Channel
