Nderohet me “Urdhrin e Lirisë”, McCain: SHBA, në krah të Kosovës

Në fund të vizitës së tij në Prishtinë, ku porositi që Kosova duhet të bëjë ndryshime duke votuar Demarkacionin me Malin e Zi, por edhe garantoi mbështetje për ushtrinë në rast të ndryshimeve kushtetuese, u ndërua me “Urdhrin e Lirisë” nga presidenti Hashim Thaçi.

“Ju, në punën dhe angazhimin tuaj për çlirimin e Kosovës dëshmuat se liria nuk është privilegj i të fortit, por e drejtë fundamentale për çdo njeri, për çdo komb”, u shpreh Hashim Thaçi, President i Kosovës.

McCain tha se do të angazhohet për mbështetjen e Kosovës.

“Ka ende shumë milje për të ecur, por mendoj se populli i Kosovës duhet të jetë krenar për arritjet. Do të bëj të pamundurën që të siguroj mbështetjen e Shteteve të Bashkuara dhe popujve të tjerë, por sidomos të SHBA-ve, për të siguruar se Kosova do të jetë e lirë, demokratike dhe e bukur siç është sot”, tha senatori amerikan John McCain.

Vizita e McCain u prit me interes në të gjithë rajonin, pasi është angazhimi i parë i tillë nga Uashingtoni, pas ndryshimit të administratës amerikane.

***

John McCain e artikuloi qartë në intervistën e dhënë “Deutsche Welle”-s, se cili ishte thelbi i rrugëtimit të tij në Europën Juglindore.

“Mesazhi im është i thjeshtë, – tha senatori republikan, njëherazi ish-kandidat për president. – Angazhimi i Shteteve të Bashkuara për një Europë të lirë dhe në paqe mbetet i hekurt dhe miqtë e mi, një Kosovë e pavarur, e fortë demokratike dhe shumetnike, si anëtare e plotë e familjes europiane, ka rëndësi kyçe në suksesin e këtij vizioni”, deklaroi senatori McCain.

Senatori kujtoi sesi Kosova është rreshtuar prej 3 vitesh në krahun e aleancës  globale kundër terrorizmit, të udhëhequr nga Shtetet e Bashkuara. Ky fakt, sipas tij, është tejet domethënës për Uashingtonin zyrtar.

Vizita e McCainit në rajon vlerësohet si tregues i përkushtimit amerikan ndaj Ballkanit, e njëkohësisht si shenjë e përpjekjeve për të ngritur një barrierë ndaj rritjes së ndikimit rus në rajon.

Senatorin amerikan, Kosova e nderoi me titullin më të lartë “Urdhri i Lirisë”. Ky çmim iu dha atij për kontributin për lirinë dhe pavarësinë e Kosovës, si dhe për rolin në thellimin e marrëdhënieve ndërmjet Kosovës dhe Shteteve të Bashkuara.

Për nder të McCainit, Kuvendi i Kosovës organizoi një seancë solemne, ku ligjvënësi amerikan iu drejtua me një fjalim deputetëve dhe qytetarëve të Kosovës. John McCain tha se Shtetet e Bashkuara të Amerikës do të vazhdojnë të mbështesin Kosovën në rrugën e saj europiane, ndërsa nuk kurseu lëvdata për Kosovën dhe angazhimin e saj në luftën kundër ekstremizmit të dhunshëm.

McCaini qëndroi për dy ditë në Kosovë, e pasdite mbërrin në Tiranë, ku do të ketë një takim me kryeministrin Edi Rama, i cili do të vazhdojë më pas me një darkë.

Top Channel