Gjykata, zvarritje ‘historike’, vetëm 14 përqind përfundojnë në afat

14/06/2016 00:00

Pa kaluar shumë kohë nga rritja e numrit të gjyqtarëve në Gjykatën e  Apelit Administrativ, kreu i kësaj gjykate, Kastriot Selita i bëri apel Këshillit të Lartë të Drejtësisë që të dërgojë trupa gjyqësore shtesë,  pasi nëse vazhdohet kështu edhe për dy vjet është e pamundur të zgjidhet mbingarkesa e dosjeve.

“Aktualisht presin për të gjykuar 12860 çështje, kështu që unë gjykoj përsëri që numri i gjyqtarëve në Gjykatën Administrative të Apelit duhet të rishikohet dhe duhet të bëhet një rivlerësim për të përcaktuar një numër më të madh gjyqtarësh”, thotë gjyqtari Kastriot Selita.

Kjo deklaratë e kryegjyqtarit u dha gjatë prezantimit të raportit nga Infocip, i cili vëren në monitorimin kombëtar të të gjitha gjykatave administrative se shqyrtimi gjyqësor zgjat përtej çdo afati. Studimi tregon se vetëm 14 përqind e dosjeve administrative përfundojnë brenda 30 ditëve.

Gert Shella, drejtor i Infoçip: Kohëzgjatja mesatare e një shqyrtimi në apel rezultoi 340 ditë, ndërkohë që në shkallën e parë në rang vendi shkon në afërsisht 135 ditë.

Xhezair Zaganjori, kryetar i Gjykatës së Lartë: Kanë nisur gjykimit 6-7 vite më parë, flitet për rikthimin në punë dhe ne e gjykojmë pas 6-7 vjetësh të rikthehet apo jo në punë.

Andi Dobrushi, drejtor i fondacionit Soros: Ka një vullnet nga vetë gjyqësori për t’u reformuar dhe për të treguar që gjërat po ecin dhe aty ku ka burime njerëzore, aty ku ka mbështetje financiare të dedikuara dhe aty ka mbështetje gjërat funksionojnë.

Ylli Manjani, ministër i Drejtësisë: Janë marrë disa masa dhe disa po marrin rrugën e zgjidhjes. Natyrisht janë programuar edhe disa masa të tjera legjislative, por për fat të keq, bllokimi i vendimmarrjes për ndërhyrje në legjislacion nuk na ka ndihmuar.

Top Channel