Pak muaj pas operacionit antiterror me jehonë ndërkombëtare të Policisë së Kosovës, në bashkëpunim me atë italiane, këtë të martë Gjykata Themelore ka dënuar me 7 muaj burg shtetasin kosovar Samet Imishti.
Aktakuza ndaj tij ishte ngritur nga Prokuroria Speciale e Republikës së Kosovës, në bazë të ligjit “Për ndalimin e bashkimit në konflikte të armatosura jashtë territorit të vendit”. Ndaj 44-vjeçarit rëndonin akuza për veprat penale “Bashkimi apo pjesëmarrja në ushtrinë ose policinë e huaj, në formacionet e jashtme paraushtarake ose parapolicore, në organizimet në grup apo individuale jashtë territorit të Republikës së Kosovës” dhe “armëmbajtje pa leje”.
“Trupi gjykues shqyrton dënimin për veprën penale: në pikën 1, me dënim 7 muaj burg dhe në pikën 2, dënim me gjobë në shumën 800 euro”, tha Agim Maliqi, kryetar i trupit gjykues.
Gjatë vendimit është dhënë masa minimale e dënimit që parashikon ligji, për shkak se i akuzuari është konstatuar si person me çrregullim afektiv bipolar nga Instituti i Psikiatrisë Forensike të Kosovës, ndaj trupi gjykues mori edhe vendimin për ndërprerjen e paraburgimit pas 5 muajsh.
Sipas aktakuzës, nga viti 2013 dhe përmes rrjeteve sociale, i akuzuari ka përkrahur haptazi luftën e Shtetit Islamik, ka bërë thirrje për t’iu bashkur ISIS-it dhe ka “lartësuar” luftëtarët, duke i ftuar publikisht që “të çlirojnë” edhe Kosovën.
Por, meqenëse ligji për pjesëmarrjen në konfliktet e huaja ka hyrë në fuqi vitin e kaluar, Imishti është gjykuar vetëm për veprat penale që ka kryer që nga maji i vitit 2015. Imishti deklaroi se nuk ishte në dijeni, që komenti në Facebook është i sanksionuar me ligj.
Ai ishte njëri nga 4 të arrestuarit në dhjetor të 2015-s. Tri shtetasit e tjerë kosovarë të arrestuar në Itali u liruan menjëherë, ndërsa Samet Imishti është mbajtur për më shumë se 5 muaj në burgun e sigurisë së lartë në Dyz.
Top Channel
