70 vjet “Partizani”, klubi i futbollit që bëri historinë në sportin shqiptar

04/04/2016 00:00

Sport Klub Partizani, një nga klubet me më shumë histori në sportin kombëtar, mbush sot 70 vjet nga krijimi i tij.

Skuadra e futbollit është iniciatorja e këtij klubi, i cili më pas u përfaqësua edhe në sportet e tjera. Sfida e parë me bluzat Partizani u luajt në 7 prill të vitit 1946, përballë 17 Nëntorit, që më pas u shndërrua në rivale e përjetshme të skuadrës së kuqe.

Një vit më pas, Partizani u shpall kampion i Shqipërisë në futboll, me një skuadër ku spikasnin emra të mëdhenj të futbollit shqiptar si Sllave Llambi, Fagu, Demneri apo Teliti. Titullin kampion, skuadra e kuqe e mbajti edhe në 2 vitet e ardhshme, ndërkohë që fitoi edhe 2 Kupa Republike.

Historia e skuadrës së futbollit Partizani, vazhdoi me rritje duke u shpallur plot 15 herë kampione e Shqipërisë dhe njëkohësisht duke nxjerrë lojtarë cilësorë, të cilët u bënë dhe baza e kombëtares shqiptare në vite.

Përveç futbollit, Partizani filloi të shkëlqente edhe në shumësportësh, duke nxjerrë Elisabeta Karabollin dhe kampionen e parë të Europës në qitje. Suksesi më i madh i këtij klubi është fitimi i Kupës së Ballkanit në futboll në vitin 1970 kundër bullgarëve të Beroe Stara Zagora, trofeu i parë dhe i fundit ndërkombëtar i fituar ndonjëherë nga një skuadër shqiptare.

Periudha më e keqe e këtij klub ishte në fundin e viteve 90’. Nën drejtimin e Albert Xhanit si president, skuadra e futbollit zbriti në kategoritë inferiore. Me kalimin e viteve dhe me ndërrimin e presidencës, tashmë Partizani është rikthyer në ditët e bukura, duke u shndërruar në një nga pretendentët për titullin kampion, trofe ky që i mungon klubit që nga vitin 1993. 

Top Channel