Edi Rama në “Top Story”: Dekriminalizimi, blof i PD-së. Nuk kap asnjë deputet tonin

“Ligji është punuar për një kohë të gjatë nga të dyja partitë. I është dhënë mundësia opozitës që të fusë çfarë të dojë dhe të shqyrtojë çfarë të dojë nga ato që kishim shtuar ne. Por meqë kanë dalë blof dhe kanë kuptuar se asnjë deputet i PS-së nuk përfshihet nga ky ligj, duan të bëjnë ndryshime që të thonë se ja e kapëm një deputet”, u shpreh shefi i qeverisë shqiptare.

Rama ka hedhur poshtë të gjitha akuzat për influencim tek gjyqësori në lidhje me Armando Prengën.

“Në qoftë se unë do të kisha në kontroll gjykatat, minimalisht përpara gjykatës do të ishte Sali Berisha dhe Lulzim Basha për 21 Janarin”, vijoi kryeministri i vendit, Rama.

Përballë debateve të brendshme në PS në prag të kongresit Rama ka mbajtur këtë qëndrim.

“Ne duhet të riformulojmë statutin dhe duhet të marrim modelet demokratike të partive që zgjedhin kryetarin me një anëtar, një votë dhe përkatësisht t’i referohemi modelit të Partisë Laburiste”, u shpreh Rama.

Edhe njëherë tjetër kryeministri ngulmoi se byroja kombëtare e hetimit është dakordësuar nga Basha.

Drafti i Byrosë është 100% i dakordësuar me Berishën, Bashën dhe i konfirmuar me shkrim nga ambasadori i SHBA-ve. Shikojini fytyrat dhe vendosni se kush ju thotë të vërtetën”, deklaroi kryeministri.

Intervista

Sokol Balla: Zoti Basha ka sjellë një vezë para emisionit, për t’iua bërë dhuratë.

Kryeministri Edi Rama: E marr si dhuratë nga koteci i PD.

Sokol Balla: Ju shqetëson sulmi në Kuvend?

Kryeministri Edi Rama: Ka një dallim të madh, sepse nëse një grupi protestuesit të sapodalë apo të padalë nga veza u takon të përdorin një vezë, por që një parti të përdorë këtë është fakt i shterimit të madh të ideve dhe fuqisë për të imagjinuar të nesërmen. Në këndvështrimin tim është ezaurim i nervave. Pas disfatës së 2013-s dhe pa u ringritur kurrë si një opozitë, por duke mbetur si një qeveri e vjetër në opozitë, PD merret me hijet e Enver Hoxhës dhe hijen e pushtetit, duke e kthyer këtë në një luftë mllëfesh, sa me tullat, sa me llaçin, sa me parqet. Një gjë shumë e trishtueshme për një parti që është katandisur në një organizatë kakarisësish.

Sokol Balla: Ka një arsye pse opozita protestoi…

Kryeministri Edi Rama: Nuk ka asnjë arsye dhe kjo nuk është e parë ndonjëherë nga ndonjë parti tjetër e madhe opozitare në botë.

Sokol Balla: I keni përdorur edhe ju bilbilat?

Kryeministri Edi Rama: Është tjetër gjë përdorimi i bilbilave dhe përdorimi dhe cënimi cinik i kundërshtarit politik.

Sokol Balla: Kemi një kundërdeklaratë të Bashës në rrjetet sociale, ku Basha jep motivet e protestës së sotme…

Kryeministri Edi Rama: Nuk ka asnjë arsye dhe asnjë motiv, por është rezultat i një ezaurimi nervor të PD-së. Sot e them që mezi e pres ligjin që ata e quajtën të Dekriminalizimit, edhe pse është një term shumë vulgar për një Republikë kushtetuese Parlamentare, që të shoh se kush janë këta kriminelë. Ligji që e kanë shkruar vet nga A në ZH dhe për të cilin kemi dhënë konsensusin tonë, nuk kap as edhe një deputet të Partisë Socialiste. Është e turpshme që u kriminalizua jeta politike, parlamentare, me një propagandë të shfrenuar vendi ynë. E vërteta është që ai ligj, më i ashpri në gjithë kontinentin tonë apo në botë, nuk kap asnjë deputet të PS-së.

Sokol Balla: Ndoshta është arsyeja pse PD ka propozuar amendamente të tjera.

Kryeministri Edi Rama: Edhe kaq sa kemi pranuar, kemi shkuar tej limiteve të të drejtave të njeriut. Kemi rënë dakord që asnjë palë të mos e çojë këtë ligj në Kushtetuese dhe në Gjykatën e Të Drejtave të Njeriut, sepse s’ka asnjë Gjykatë Kushtetuese dhe asnjë Gjykatë Strasburgu që të mos e hedhë poshtë këtë. Sepse s’ka asnjë parti që përcakton si kriminel një deputet. Kriminel të përcakton gjykata dhe jo partia. Kjo histori s’ka asnjë lidhje me ne, me koalicionin apo me PS-në. Në rastin konkret Armando Prenga është përjashtuar menjëherë nga anëtar i PS-së, sapo doli një çështje që pritet ta zbardhë gjykata nëse ai është kriminel apo jo.

Sokol Balla: Lidhur me amendimin e Dekriminalizimit… nuk do t’i pranoni këto amendime?

Kryeministri Edi Rama: Ligji është punuar për një kohë të gjatë nga të dyja partitë. I është dhënë mundësia opozitës që të fusë çfarë të dojë dhe të shqyrtojë çfarë të dojë nga ato që kishim shtuar ne. Por meqë kanë dalë blof dhe kanë kuptuar se asnjë deputet i PS-së nuk përfshihet nga ky ligj, duan të bëjnë ndryshime që të thonë se ja e kapëm një deputet.

Sokol Balla: Pse e quani ngjarje të shëmtuar për sa kohë që gjykata nuk ka përcaktuar fajësinë apo pafajësinë?

Kryeministri Edi Rama: Për ne mjafton një deputet, i përfshirë në një sherrnajë të atyre përmasave dhe i ndaluar nga policia me urdhër të Prokurorisë, dhe ai mbetet jashtë grupit parlamentar dhe jashtë PS. Edhe një deputet që gjuan me vezë nuk ka vend në partinë tonë, jo më një deputet që është përfshirë në një çështje ku ka pasur të plagosur.

Sokol Balla: Sapo i dhatë të drejtë Blushit që ka thënë se në PS bëhesh deputet nëse ke armë pa leje, ndryshimi është se Prenga e kishte me leje…?

Kryeministri Edi Rama: Nuk më takon të merrem me të tilla gjykime dhe opinionet e mia jopozitive ndaj çdo socialisti nuk i ndaj me publikun. Sa i përket kësaj çështjeje, kjo është montuar politikisht nga fillimi në fund. Nëse do të kthehesha në 2013-n do të bëja të njëjtën zgjedhje që kam bërë, sepse nuk kam zgjedhur në listën e PS asnjë kriminel. Kam respektuar parimet e PS-së në zgjedhjet e kaluara dhe kam kërkuar nga të gjithë deputetët, për herë të parë, dëshminë e penalitetit. Atë dokument kishim në atë kohë, nuk e kishim këtë ligj që kemi sot. Të gjithë kandidatët e atëhershem, dëshminë e kanë pasur të bardhë. Po të njihja ndonjë kriminel do ta nxirrja unë se kush ishte, por nuk mund të ngre gishtin në hava, pavarësisht përpjekjeve të dështuara të opozitës, që mbetet një qeveri e vjetër së cilës i ka mbaruar historia në 2013-n dhe nuk po gjen mundësitë për të bërë opozitën e shqiptarëve.

Sokol Balla: Si i përzgjedh një kryeministër si ju njerëzit që duhet të bëhen deputet. Blushi ka sulmuar Prengën, ndërkohë që ky i fundit ka dhënë një deklaratë sot se për Blushin në atë kohë nukka qenë një kriminel. Ju kujt i qëndroni?

Kryeministri Edi Rama: Unë u qëndroj të vërtetave të thjeshta, që i ndaj me ndjeshmëri dhe në mënyrë të drejtpërdrejtë me njerëzit. Njerëzit gjykojnë, fjalët gjykojnë veprat dhe faktet. Për fat të mirë, shqiptarët unë kam pasur fatin t’i provoj më shumë se një herë, ata nuk manipulohen lehtë. Nëse do të bëheshin, nuk do të isha zgjedhur aq herë si kryebashkiak i Tiranës. Më kanë akuzuar për gjithfarë lloj poshtërsish dhe maskarallëqesh, por kur dikush që të akuzon për diçka që nuk e ke bërë, ki kujdes se mund ta bëjnë vet. Nëse më akuzojnë se kam ndërhyrë te gjykatësit për të nxjerrë Prengën nga arresti shtëpiak për ta sjellë në Parlament, janë ata që kanë bërë gjithfarë lloj makinacionesh për këtë gjë. Unë nuk i kam në kontroll gjykatat dhe jam shumë i lumtur që nuk i kam as unë dhe as ky sistem, që nuk e bën të mundur të kesh kontrollin e plotë ndaj gjykatave. Ndaj duam reformën në drejtësi, që gjykatat të funksionojnë normalisht. Nëse ka një arsye për të diskutuar për këtë është qëllimi për të bërë reformën në drejtësi, që ka interes PD-ja që ta shmangë.

Sokol Balla: Do të flasim edhe për reformën në drejtësi, por ju nuk do të pranoni amendimet e PD-së për Dekriminalizimin.

Kryeministri Edi Rama: Po si mund të bësh një ligj për një person? Po nëse nesër bëhet edhe dikush tjetër, e kështu me radhë? Cfarë do të bëhet, do të pezullohet nga jeta publike dhe çfarë vendi jemi ne që të bëjmë ligje të posaçme për një person, si të ishte për një ndërtim pa leje.

Sokol Balla: Në republikën e gangsterëve thotë Basha…

Kryeministri Edi Rama: Këto janë shprehje të vjetra që janë përdoru aq shumë, sa kanë humbur kuptimin dhe forcën. Ndaj ka përfunduar PD në këtë pikë, sepse s’ka lënë gjë pa thënë, në 99% të rasteve pa vend fare, saqë njerëzit nuk kanë më kohë të dëgjojnë këtë retorikë vulgare.

Sokol Balla: Ju thatë se asnjë deputet nuk preket nga ky ligj, a është ai i dështuar?

Kryeministri Edi Rama: Jo Sokol, është blof gjithë propaganda që ka bërë PD-ja për të kriminalizuar PS-në dhe qeverisjen e saj, sepse faktikisht e bën ligjin siç e donin vet dhe u thanë shqiptarëve se janë 9 kriminelë që do të largohen nga Parlamenti. Asnjë s’ka për t’u larguar, sepse asnjëri nuk është kriminel dhe nuk është subjekt i atij ligji. Kush është kriminel aty?

Sokol Balla: Referencat kanë qenë për Ndokën, Frrokun, Doshin…

Kryeministri Edi Rama: E para Frroku nuk ka qenë kurrë deputet socialist, por i një partie të vogël në koalicion me qeverisjen tonë dhe ne nuk kemi përgjegjësi për listat e tyre. E dyta, Doshi është larguar nga PS jo si kriminel, sepse nuk e kam njohur kurrë të tillë. Kriminel do të thotë të kesh bërë krime dhe të jesh gjykuar si i tillë nga gjykata. Nuk jam penduar as sot për përjashtimin e Doshit, por nga kjo e deri te kriminalizimi i tjetrit është diçka me shumë diferencë. Prej atëherë janë kriminalizuar persona dhe familje të tëra, por ku jemi ne? Kur gjuha arrin deri këtu dhe skandali etik deri këtu, edhe nga Parlamenti Europian tmerrohen, por nuk u shkon mendja se mund të mashtrohet deri në këtë farë feje. Ne si PS kemi mbajtur qëndrim shumë të prerë dhe s’kemi mbrojtur askënd. Dy persona si Doshi e Prenga i kemi përjashtuar nga partia dhe grupi parlamentar, por jo se i kemi gjykuar si kriminelë. Ndërkohë që PD, kryetarin e Kamzës, të dënuar si hajdut nga gjykata, e konsiderojnë të persekutuar politik, sikurse edhe ish-ministrin e tyre të arrestuar. Kujt ia tregojnë këta këtë dyfytyrësi kur flasin për këtë çështje? A mos janë këta ëngjëj? Këta që shtrinë 4 persona në rrugë më 21 janar dhe që i kanë ikur gjyqeve me raporte mjekësore?

Sokol Balla: Fleckenstein iua kërkoi miratimin që në janar të Dekriminalizimit?

Kryeministri Edi Rama: Në fakt është një deputet i PD-së që po merret me aktet nënligjore, si Bylykbashi. Pse nuk i kanë sjellur? Këta janë një kotec, nga ku kanë harruar dhe kanë ngatërruar ditën me natën dhe i vënë të kakarisin duke i bërë të gjithë vrasës.

Sokol Balla: Strazimiri, Berisha dhe disa të tjerë kanë paralajmëruar se mund të lënë mandatin e deputetit?

Kryeministri Edi Rama: Kjo do të ishte humbje e madhe për Shqipërinë, për Parlamentin, nëse Berisha do të linte mandatin. Pa harruar këtë tjetrin që vuri kujën kur hëngri një shuplakë dhe sot bën si i fortë pse gjuajti një vezë. Normalisht e para është e papranueshme, por në momentin që dhunon tjetrin nuk mund t’i biesh gjoksit.

Sokol Balla: Kjo është arsyeja pse Ruçi kërkon përjashtimin e tyre nga Parlamenti?

Kryeministri Edi Rama: Çfarë e dinë veten këta që marrin vezë e gurë në Parlament? Janë disa humbësa që thanë se socialistët na e morën programin dhe u sulën t’i vinin zjarrin bunkerit. Thanë që na e morën programin se na ulën taksat, ndërkohë që tani iu sulën parkut të Liqenit për të shkatërruar gjithçka që po ndërtohet. Si mund të justifikohet veprimi fizik, i kuptoj grevën, protestën dhe flijimin po të doni, por jo dhunën fizike ndaj asaj që ti nuk pëlqen. Kush je ti që nëse s’të pëlqen bunkeri, të lind e drejta ta prishësh?

Sokol Balla: Bëhet debati për Dekriminalizimin, ligji në fakt nuk ndryshon ndonjë gjë thelbësore, por problem mbetet arroganca kur deputetët që gjykohen se mund të preken nga ky ligj dalin krah jush nëpër evente të ndryshme…

Kryeministri Edi Rama: Unë nuk pretendoj që ata të PD-së të mund të arrijnë ndonjëherë në pikën që të kuptojnë se çfarë është një vepër arti, e kanë të drejtën e tyre që të jenë injorantë në këtë fushë. Por si mund të thyejnë një vepër arti në godinën e Kryeministrisë, në një kohë që e pëlqen apo jo, është një vepër arti me një vlerë të jashtëzakonshme dhe që qëndron në një prej muzeumeve më të mëdha ndërkombëtarë dhe është dhuratë për popullin shqiptar. Si mund ta thyejnë këta një pasuri kombëtare? Të marrësh gurët dhe ta thyesh e të shkatërrosh një pasuri të popullit, jo e imja personale, kjo është barbari. S’të pëlqen parku i lodrave, punë e madhe shumë për PD-në. Ke të drejtën të protestosh e të vësh kujën, por s’të jep njeri të drejtë të veprosh në mënyrë fizike dhe të prekësh pronën e dikujt. Cënimi fizik i personit dhe i pronës publike apo private është krim. Parimi këtu është i thjeshtë: mund të jesh kundër mëngjes, drekë e darkë, por nuk mund të cënosh fizikisht. Kjo e ndan qytetërimin nga barbaria. Këtu ka një hipokrizi të madhe ku kontribuojnë të gjithë. PO flisni me një njeri, që ka mbjellë 55 mijë pemë dhe shkurre dekorative, duke vendosur veton si kryebashkiak për të mbjellë këto. Asnjë nuk është shkulur gjatë asaj kohe. Ai park do të bëhet park lodrash për fëmijët.

Sokol Balla: Te ai parku do të shtohet beton, ndoshta nuk priten pemë.

Kryeministri Edi Rama: Nuk e bëj unë parkun, për këtë pyesni kryebashkiakun. E bëj këtë sepse unë refuzoj barbarizmin, vandalizmin dhe injorancën, që tundin flamuj që janë alibi kauzash të sajuara dhe të dështuara, kjo është e papranueshme. Unë pretendoj që debat sa të duash, protesta sa të kesh qejf, por jo cënim fizik.

Sokol Balla: Te protesta e PS-së nuk pati dhunë…

Kryeministri Edi Rama: Jemi dy botë të ndryshme dhe nëse më pyesni për pjesën dhe punën tonë, sesi përpiqemi t’i zgjidhim problemet, mund të them se ka gjëra që mund t’i kishim bërë më mirë, më shpejt dhe që mund të jepnin rezultate në mënyrë më të dukshme, por një gjë është e sigurt: mes nesh dhe qeverisë së vjetër që nuk po arrin dot të bëhet opozita e re e këtij vendi, ka një hendek të madh botësh të ndryshme për mënyrën si duhet të funksionojë shteti, shoqëria dhe çdo gjë që i fut në bashkëveprim të tilla gjëra.

Sokol Balla: Në atë karrige ku jeni ju kanë qenë kundërshtarë dhe aleatë tuaj. Disa kanë thënë se i japin të drejtë parimisht Ben Blushit, si mund të thoni se jeni ndryshe nga ata, kur e keni shkelur Statutin për 3 vite? Flas për parime, sepse ju e njihni më shumë këtë fushë.

Kryeministri Edi Rama: Mos flisni me melankoli për gjërat që kanë përmendur të tjerët. Edhe fakti që diskutohet për Statutin e PS tregon që jemi dy botë të ndryshme. Keni dëgjuar për rregullat që kanë atje, si funksionojnë atje? Përgjigjja ime është shumë e thjeshtë, e sinqertë. Ne fituam zgjedhjet në 2013-n dhe u votuam për të qeverisur Shqipërinë. Në ato kushte askush, në Kryesi, në grupin parlamentar apo në parti, nuk e pati mendjen që të thotë se duheshin bërë zgjedhjet në parti, sepse do të ishin një tallje me publikun, që na votoi për të qeverisur vendin. Në shtator morëm një vend të rrënuar dhe një mal i fshehur me borxhe, dhe ne nuk mund të thonim prisni se nuk do e thërrasim FMN-në për të bërë zgjedhje në parti. Ne nuk kemi pasur të përgatitur në Statutin tonë pjesën kur fitojmë zgjedhje, e modifikuam atë në një rregullore pafund në opozitë, por nuk menduam se çfarë ndodh kur kryetari bëhet kryeministër pas fitores së zgjedhjeve në raport me funksionimin kur është në pushtet. Kush nuk do të dëgjojë, nuk do. Partitë që i zgjedhin udhëheqësit me një anëtar një votë dhe jo me Kongres, kur lideri i zgjedhur nga partia për të kryesuar betejën dhe e fiton atë, ai është automatikisht lider. Këto zgjedhje kanë mekanizma sesi mund të kundërshtohet udhëheqësi, por jo sesi mund të bëhen zgjedhje në mes të mandatit.

Sokol Balla: Edhe një pyetje dhe ta mbyllim, s’do të ketë garë për kreun e PS?

Edi Rama: Kjo nuk është një përgjigjie që nuk e jap unë, sepse PS nuk është PD dhe siç e thamë është një botë tjetër, është një botë larg së qënuri e përsosur, por konceptet e lirisë dhe demokracisë dhe ndërveprimit me vlerat janë reale, jo thjesht të shkruara në letër, pasi kemi kapërcyer vitin më të vështirë, kur ndaluam hemorragjinë dhe shpëtuam vendin nga një kolaps energjitik dhe financiar dhe pasi kemi fituar zgjedhjet e 2015, duke rikonfirmuar pas 18 muajsh reforma të vështira dhe të dhimbshme, mbështetjen popullore të 2013, jemi mbledhur kemi diskutuar për nevojën që të kthejmë sytë nga partia dhe riorganizimi i saj duke nisur procesin e zgjedhjeve në të gjitha nivelet. Problemi është që nuk u bënë zgjedhje në asnjë nivel dhe të gjitha institucionet ishin përtej kohës normale të tyre. Në atë diskutim kemi vendosur që të hyjmë në një proces hapjeje dhe riorganizmimi të PS, zgjedhje në të gjitha nivelet dhe për këtë çështje (zgjedhjen e kryetarit) të vendosë Kongresi. Është kongresi që do të diskutojë dhe do të vendosë në liri të plotë.

Sokol Balla: Si një anëtar i PS, ju në këtë debat ku do të qëndronit?

Edi Rama: Unë qëndroj në pozicionin që ne duhet të riformulojmë statutin dhe duhet të marrim modelet demokratike të partive, i referohemi modelit të Partisë Laburiste. Në momentin që partia fiton zgjedhjet, lideri është kryeministër, mandati i tij është i konfirmuar nga vota dhe të garantojmë me statut të drejtën e kontestimit në rast se krijohen kushte që partia të thirret në një proces zgjedhor, pra një mundësi për të bërë zgjedhje edhe gjatë mandatit.

Sokol Balla: A është më ai neni i famshëm i propozuar prej jush për pakicën e partisë?

Edi Rama: Nëse do të kthehesha prapë, nuk do ta bëjë atë që kam bërë atëherë. Nuk është punë pendesë, është ndryshim i një pozicioni. Në atë kohë nuk e njihja partinë, nuk e dija si funksiononte ajo nga brenda dhe njohja nga brenda e saj më bindi që kam qenë i gabuar, ashtu sikundër njohja më e gjerë e mënyrës sesi funksionojnë partitë dhe kam arritur në përfundimin që kam qenë i gabuar.

Sokol Balla:  Ka disa institucione ndërkombëtare si Banka Botërore, apo FMN që miratoi marrëveshjen e radhës, ju ishit në një takim me BERZH në Londër ku u miratua fondi prej 300 mln eurosh për bujqësinë dhe peshkimin, të gjitha këto tregojnë se ekonomia ngadalë ka dhënë disa shenja përmirësimi, por përse e shkarkuat ministrin e Financave?

Edi Rama: Fjala shkarkim është një fjalë e papërshtatshme. Faktikisht ministri ka bërë një punë shumë të mirë, por gjithmonë brenda filozofisë time që Qeveria është një skuadër që duhet të punojë në mënyrë kompakte dhe që Qeveria nuk duhet të ndryshohet me variantin riformatim, kam parë të domosdoshme për të bërë një zëvendësim pa prishur filozofinë e skuadrës.

Sokol Balla: Në intervistën e dhënë gjatë samitit të NATO-s në Uells në 2014-n, keni dhënë që për çdo ndryshim në kabinet, përgjegjësia është e kryeministrit dhe keni ndryshuar çerekun e kabinetit…

Edi Rama: Pata thënë atë përgjigjie në atë kohe dhe ju e dini shumë mirë si kanë ndodhur ndryshimet.

Sokol Balla: A u shkarkuar për koncesionin e TVSH-së Shkëlqim Cani?

Edi Rama: Kështu e thotë balta (Partia Demokratike) që flet me fytyrën dhe zërin e qeverisë së vjetër, siç thotë që Ilir Beqaj është i korruptuar, siç thotë që Tahiri është i inkriminuar. Në këto nuk ka asgjë të vërtetë, janë të gjitha pjesë e një dëshpërimi të madh dhe e asaj që thashë. Një parti që duhet të bëjë opozitën dhe nuk e bën, por është qeveria e vjetër që na rri përballë dhe i duket sikur është në ëndërr. E kanë thënë vetë, që populli gaboi që i përzuri dhe vazhdojnë të njëjtën gjë që bënin. Është krejtësisht e pavërtetë. Po bëjmë reforma që të tjerët para nesh nuk morën guximin t’i bëjnë dhe po ju them disa fakte që çfarëdo do të ndodhte në Shqipërinë e sotme nëse do të ishin bërë kohë më parë. Nëse reforma në energji do ishte bërë 20 vite më parë, do ndodhte që në vend që të mbushnim çdo vite me paratë e njerëzve që paguanin një gropë që hapej nga hajdutëria, do të kishim 60 vjet investime në shëndetësi. Do të kishim 40 vjet investime në arsim, 30 vjet investime në bujqësi, nëse do kishim bërë reformën e teksteve 20 vite më parë, do kishim 414 mijë persona që do kishin një formim krejt tjetër dhe do ishin një krah pune i kualifikuar.

Sokol Balla: Megjithatë…

Edi Rama: Sa për Ilir Beqajn, është një ministër i korruptuar për një arsye të dukshme, për të njëjtën arsye që tregon historia në vende të ndryshme, që reformatorët përbalten dhe goditen në emër të moralit dhe vyrtyteve. Beqaj i ka hequr 70 mln dollarë lobeve të ilaçeve dhe rrijnë në xhepat e familjeve që kanë nevojë për ilaçe. Me atë reformë kemi ulur me 30 përqind çmimin e ilaçeve, që mungojnë në xhepat e lobeve që janë në një konflikt të madh me këtë qeveri dhe Ilir Beqajn dhe ata financojnë baltën. Kanë interesa të lidhura me qeverinë e vjetër dhe me segmente të ndryshme që bëjnë rezistencë. Lazarati nuk ishte thjeshtë plantacione që u dogjën, por një bankë e parasë së zezë, që e hodhi në erë Saimir Tahiri.

Sokol Balla: Mirë pra, balta thotë që ju hoqët Canin dhe futë Ahmetajn për koncesionit e TVSH-së, ku ju akuzon se keni interesa personale,  çfarë do t’i thoni baltës nëse Ahmetaj e firmos?

Edi Rama: Ju të gjithë intelektualëve, arsimtarëve, gazetarëve që duhet të bëni një gjë të thjeshtë, këto që thotë balta duhet të verifikohen.

Sokol Balla: Na thoni të vërtetën për koncesionin e TVSH-së? Çfarë lidhjesh keni ju?

Edi Rama: E vërteta është kjo që çfarë thuhet dhe çfarë propagandohet është një maskaradë e pashoqe sepse nuk japim në koncesion mbledhjen e TVSH-së. Ne duam të ndërtojmë një partneriteti publik-privat, të shfrytëzojmë kapitalin dhe dijet e privatit për të zgjeruar kapacitetin teknologjik të tatimeve. Sot tatimet e Republikës janë në një bazë të dhënash që administrohet nga austriakët, që janë privatë dhe nuk është ndonjë skandal, nuk është alarm. Ne duam që këtij truri elektronik që kemi vënë në punë, t’i shtojmë një kapacitet dhe të përfshijmë në këtë shtim një element të rëndësishëm në luftën kundër informalitetit; raportimin në kohë reale të çdo transaksioni, të blerjes që bën gjithsecili, që sot sistemi nuk e bën, por raporton njëherë në 24 orë dhe me probleme.

Sokol Balla: Përse kaq shumë kushton, pse mos e bëjë shteti?

Edi Rama: Komisioni Europian, në projeksionin që ka bërë për Ballkanin Perëndimor ka thënë që i mungojnë 100 miliardë euro dhe Komisioni ka thënë gjithashtu që janë të gjenerueshme përmes partneriteti publik-privat. Privati do të bëjë investimin.

Sokol Balla: Megjithatë, privati kot nuk do investojë. Sa do të përfitojë ai?

Edi Rama: Nuk është hapur akoma gara, ndaj këto janë muhabete balte. Marr kontrollin mjekësor falas. A ka më turp që t’i kundërvihesh kësaj? Kishim një popull të tërë pa kartela. Një problem i madh për njerëzit dhe për sistemin shëndetësor. U kemi thënë shqiptarëve për 20 vjet bëje kontrollin dhe paguaj 51 mijë lekë, ose shko të privati dhe paguaj 80 mijë lekë, ndërsa ne e bëjmë falas dhe nga buxheti paguajmë 18 mijë lekë nga fondi i shëndetësisë dhe u jep mundësinë qindra-mijëra njerëzve që të kontrollohen dhe qeveria i jep mundësi vetes që të krijojë një bazë solide të dhënash, që do na çojë tek shëndetësia falas. Sot mjeku i familjes është falas. Sot në QSUT një qytetar paguan 7 deri 10 fish më pak se në të kaluarën. Ne do ta realizojmë qëllimin tonë për një shëndetësi falas dhe balta nuk do të na pengojë.

Sokol Balla: Akuzat për përfshirjen e vëllait tuaj në koncesionin për TVSH-në nuk iu përgjigjët.

Kryeministri Edi Rama: Nëse ka një gjë që gjithmonë ka qenë i vetmi problem i imi, kur e kam ndierë baltën të më futet në të gjitha poret e trupit, ka qenë ngarkesa që i është krijuar familjes dhe në radhë të parë nënës sime. Im vëlla, për të cilin vë dorën në zjarr për ndershmërinë dhe për njerëzillëkun e tij, u shfaq në një fotografi bashkë me një shokun e tij që kanë kaluar vite në emigracion, në Kinë në një kompani kineze, dhe kjo u publikua si implikim i tij në procesin për garën për zonën ekonomike të Spitallës në Durrës. Një zonë ekonomike që do të krijojë një punësim real shumë të madh në 10 vitet e ardhshme. Pavarësisht se e gjitha ishte një manipulim i opinionit publik, vetëm se kishte një të vërtetë që shoku i tij, shumë i mirë në dijeninë time, e kishte ftuar tim vëlla për t’i vizituar këto kompanitë dhe njëra prej tyre kishte konkurruar, unë i kërkova ministrit Ahmetaj të anulonte procedurat. Ky jam unë, por ta harrojnë se mund të njollosin familjen time. Mua më kanë hedhur të gjithë pjesën më me substancë të baltës që prodhojnë dhe le ta vazhdojnë, sepse bëhem më i fortë. Kjo është e vërteta. E kam bërë se nuk mund të pranoja që të cënohej im vëlla dhe ky integritet i rëndësishëm i imi në raport me familjen.

Sokol Balla: Mosdekretimi i ministrave, a ndieni përgjegjësi në acarimin e marrëdhënieve me Nishanin.

Kryeministri Edi Rama: Është e tejkaluar kjo.

Sokol Balla: E tejkaluar, por dalin sërish disa situata me kosto të caktuara nga batutat e tua.

Kryeministri Edi Rama: Nëse ju njoh mirë juve ju ka pëlqyer batuta, por nuk do e përsëris.

Sokol Balla: Është problem i kaluar?

Kryeministri Edi Rama: Avioni iku, jeta vazhdon…

Sokol Balla: Kemi një grevë të avokatëve që ka bllokuar proceset gjyqësore në të gjithë vendin.

Kryeministri Edi Rama: Është pjesë e fleksibilitetit të partnerit tonë të koalicionit, por a ka shqiptar dhe njeri që mund të besojë se një avokat fiton në muaj sesa një grua që shkon e punon në fason?

Sokol Balla: Kjo është e vërteta?

Kryeministri Edi Rama: Ky është pretendimi, që avokatët fitojnë 100 mijë të vjetra në muaj, por nuk i kuptoj pse punojnë avokatë dhe jo në fason. E vërteta është që shumë avokatë deklarojnë pagën minimale. Si mund t’u mohojmë punëtorëve që punojnë në fabrika hapur me rroga të ulëta, të cilëve u kërkojmë sigurimet, dhe të lejojmë avokatët të mos paguajnë. E kemi përshkallëzuar qoftë për kohë dhe qoftë për rajon. Avokatët e rinj vërtet mund të mos fitojnë shumë, por një i vjetër nuk mund të fitojë 100 mijë lekë të vjetra në muaj.

Sokol Balla: Thelbi i vizitës së Kerryt duket se janë përgjigja e Komisionit të Venecias.

Kryeministri Edi Rama: Unë prej me kuriozitet të di se çfarë kërkon opozita. Nëse kontrolli i drejtësisë do të ishte problemi i vetëm, do të isha gati të negocioja në këtë pikë. Ata thonë duam 2/3-tat, një mazhorancë për të ndryshuar Kushtetutën. Ne zgjedhim Presidentin me 50%+1, ndërsa një prokuror apo një noter duhet ta zgjedhim me 2/3-tat? Si i bëhet faktit që duke bërë një pazar, se problemi nuk është kush do e kapi sistemin, por që politika të mos e kapë. Nëse e kap Rama, Meta apo Saliu, ky nuk është problemi në thelb, por që të mos e kapë politika. Pse ne duhet që atyre personave sa më të pavarur t’u ngarkojmë këtë? Ajo që për mua është thelbi: ne i kemi tani premisat për ta përmbysur sistemin, për ta bërë tërmetin të plotë. Nëse do të qëndrojmë në këto premisa dhe do të lejojmë që prokurorët dhe gjykatësit të kalojnë në skanimin e aftësive dhe pasurive të tyre…

Sokol Balla: Basha thotë që është kundër Vetingut sipas draftit të qeverisë, siç thotë ai.

Kryeministri Edi Rama: Nuk ka draft qeverie, drafti është i shkruar nga ekspertë të EURALIUS, me në krye një gjerman, sepse qeveria ka shumë shumë partizanë, OPDAT-i amerikan dhe ekspertë shqiptar. Siç e kemi dëgjuar, ambasadori amerikan thotë jemi bashkautorë.

Sokol Balla: Ambasadori mbështeti Bashën kur ju kërkoi të votonit Byronë e Hetimit, por nuk e shoh ambasadorin t’iu mbështesë kur ju thoni ta miratojmë?

Kryeministri Edi Rama: Ambasadori amerikan është shprehur. Nuk mund t’i kërkoj që të dalë e të thotë që Luli është gënjeshtar. Nuk mund t’ia kërkoj dhe s’besoj se e thotë këtë, sepse nuk i takon ta bëjë një gjë të tillë në pozicionin që është. Çdo njeri pas të 40-tave ka fytyrën e tij. Lulzim Basha është një gënjeshtar që realisht kam arritur të mendoj se është i pafajshëm. Sepse e ka të pamundur fiziologjikisht që të mos gënjejë. Edhe kur i thua sa është ora, ai gënjen. Drafti i Byrosë është 100% i dakordësuar me Berishën, Bashën dhe i konfirmuar me shkrim nga ambasadori i SHBA-ve. Shikojini fytyrat dhe vendosni se kush ju thotë të vërtetën.

Sokol Balla: Lidhur me krizën e refugjatëve, duket se po i afrohet realisht Shqipërisë. A jemi gati ne t’i presim dhe në shkëmbim a do të marrin një mbështetje financiare për këtë?

Kryeministri Edi Rama: Ne nuk do të hapim kufirin, s’kemi arsye ta bëjmë këtë gjë, sepse nuk kemi as kushtet, as fuqinë dhe as delirin që mund të shpëtojmë botën. Shpresoj që nga mbyllja e kufijve, Europa të kuptojë se nuk mundet dot të vazhdojë duke ia hedhur vetvetes, ku të gjithë luajnë duke u munduar t’ia hedhin Gjermanisë, Italisë e Greqisë, që mezi mbahet në këmbë edhe vet, jo më me refugjatët.

Sokol Balla: Në të shkuarën keni qenë më i disponueshëm, a keni ndryshuar?

Kryeministri Edi Rama: Jo, është normale që të ishim të disponueshëm, nëse do të kishte një ndarje proporcionale të refugjatëve. Madje Maqedonia dhe Serbia kanë qenë më të gatshme, sesa shumë vende të tjera europiane. Ne nuk mund të jemi të gatshëm t’i presim të gjithë, nëse nuk marrin edhe të tjerët.

Sokol Balla: Si mund ta interpretojmë deklaratën e ministres Gjosha?

Kryeministri Edi Rama: Po e përsëris, ne nuk mund të mbajmë të gjithë barrën e refugjatëve. S’kam thënë kurrë që të gjithë të mbyllin dyert dhe kufijtë, dhe të vijnë te ne. Kam qenë i gatshëm nëse secili vend do të merrte barrën e vet. Jemi në momentin kur Gjermania e ka kërkuar këtë, por unë shpresoj që të jemi në gjendje që të rezistojmë. Jemi në bashkëpunim me qeverinë italiane dhe shpresoj që të rezistojmë, sepse edhe nëse vinin këtu, nuk besoj se do të qëndronin në Shqipëri por do të synonin të kalonin për në Itali.

Sokol Balla: Ju falënderoj dhe ruajeni vezën e Bashës…

Kryeministri Edi Rama: Zoti Basha nuk mund të bëjë dot as edhe një vezë, por vezën e pulës do ta ruaj si një nga reliket e Parlamentit, kur Saliu ishte gjallë.

Top Channel