Sulm me armë në një hotel në Irlandë, autorët të veshur si policë
06/02/2016 04:00
Situata e tmerrshme për gratë dhe fëmijët afganë 25/11 08:12
Tre persona të armatosur, dy prej të cilëve të veshur si policë dhe një tjetër i maskuar si femër, kanë kryer një sulm me armë në një hotel në Dublin, Irlandë, duke vrarë një dhe plagosur dy të tjerë.
Në ambientet e hotelit ku ka ndodhur sulmi ishte duke u kryer procesi i peshimit të boksierëve për një ndeshje boksi.
Në deklaratën e lëshuar nga policia e Dublinit thuhet se është qëlluar brenda dhe jashtë ambientit ku ndodheshin boksierët. Pas kësaj ngjarje të rëndë, ndeshja e boksit është anuluar.
Një zyrtar i policisë tha se sulmi nuk ka lidhje me terrorizmin, ndërsa po hetohet e shkuara e personit të vrarë dhe të të plagosurve.
Një video amatore është publikuar në ambientet ku ndodhi ngjarja. Një boksier sapo ishte peshuar kur nisën të shtënat e para, ndërsa në sallë kishte një numër të madh personash, mes tyre edhe një fëmijë i vogël, i cili dëgjohet duke qarë.
Policia po kryen kontrolle të imtësishme në zonën përreth ku ndodhi sulmi, ndërsa mblodhi edhe dëshmitë e të pranishmëve në sallë, për të arritur në identifikimin e autorëve të sulmit.
Top Channel
