Rrëfehet De Biasi: Refuzova një ofertë prej 5 milionë eurosh

“E ardhmja për mua është Shqipëria, Europiani dhe pastaj kualifikueset e Botërorit ‘Rusi 2018’, më shumë në kohë nuk mund të parashikojmë pasi varet nga shumë faktorë, por besoj se kam treguar gjithmonë se kam synime të mira për të qëndruar këtu dhe kam treguar se nuk shpërqendrohem nga sirenat që kanë tentuar të më joshin”, tha tekniku italian.

Para pak ditësh De Biasi ka drekuar me presidentin e FSHF-së, Armand Duka, ku ka marrë edhe premtimin për përmirësimin e aspektit financiar të kontratës.

“Kontrata ishte e shkruar dhe u rinovua automatikisht kur arritëm kualifikimin. Unë nuk kërkova gjë, por e di që presidenti me bujarinë e tij do t’ia dalë të më përmirësojë kontratën mua dhe bashkëpunëtorëve të mi. Jam i bindur që do e bëjë, por edhe nëse nuk e bën kjo nuk ndryshon asgjë”, vijon ai.

Pra, nuk është një çështje parash dhe për të provuar diçka të tillë, De Biasi bën edhe një rrëfim sensacional, pasi vetëm pak javë më parë ka refuzuar jo pak, por plot 5 milionë euro nga një ekip kinez për të qëndruar me Shqipërinë.

“Është e vërtetë, një ofertë që më erdhi para 3 javësh. Nuk e mora në konsideratë edhe pse ishin shumë para, 2 milionë e gjysmë euro në vit për dy vjet, plus bonuset dhe gjithë të tjerat, por besoj se për mua kënaqësia më e madhe është të jem me djemtë e mi në Francë dhe mundësisht t’i çoj sa më lartë të jetë e mundur. Besoj se ky është urimi që ju bëj të gjithëve”, shprehet De Biassi.

Top Channel