Në Shushicë të Vlorës, rreth 200 pensionistë dhe invalidë kanë që në dhjetor të 2014 pa marrë atë që u takon ligjërisht; pensionin e këtij muaji.
Arsyeja se përse nuk u është derdhur pensioni i dhjetorit të 2014 është aq banale saqë vetëm në Shqipëri mund të ndodhë.
“Fiks Fare” denoncoi këtë të hënë rastin e pazakontë të pensionistëve të Shushicës. Gazetarja e Fiksit udhëtoi në Risili, rreth 5 kilometra larg qytetit të Vlorës pas denoncimit të mbërritur në zyrat e emisionit, ku një pensionist jepte arsyet se përse nuk u kalohej pagesa që u takon.
Pensionistët thonë se në dhjetor të një viti më parë, personi që shpërndante pensionet në postë u arrestua për abuzime me paratë e energjisë dhe për këtë arsye pensionistëve të 3 fshatrave nuk u kaloi pensioni për muajin dhjetor.
Pensionistët thonë se janë ankuar tek drejtori i postës, i cili fillimisht u kishte thënë se duhej të prisnin sa të mbaronte hetimi. Por hetimi mbaroi në muajin maj dhe kur pensionistët dhe invalidët u paraqitën për të marrë pagesat përkatëse, drejtori u nxjerr një tjetër arsye.
“Pastaj na tha që duhet të mbarojë gjykimi përfundimtar”, thonë pensionistët.
Ata deklarojnë se janë ankuar edhe tek Sigurimet Shoqërore.
“Na thonë që problemin e kemi me postën, ne ua kemi kaluar lekët. Nuk keni punë me ne”, thonë pensionistët.
Top Channel
