Thaçi: Rusia, një kërcënim për Ballkanin

Në një intervistë për gazetën austriake “Die Presse”, duke folur për pamundësinë e Kosovës për t’u bërë anëtare e OKB-së për shkak të vetos së Rusisë, Thaçi ka thënë se rusët nuk mund të jenë serbë më të mëdhenj se vetë serbët.

Duke iu referuar dialogut për normalizimin e raporteve me Beogradin, Thaçi thotë se edhe Rusia do të duhej të kishte një pamje pozitive për Kosovën, duke e njohur pavarësinë e saj.

“Ne duam marrëdhënie të mira me Rusinë, por e shohim atë si një kërcënim, pasi Moska dëshiron të rrisë ndikimin në rajonin e Ballkanit, më shumë sesa në të kaluarën”, ka thënë zv.kryeministri kosovar.

Sipas tij, sa më shumë që BE-ja vonon për ta pranuar këtë rajon si pjesë të saj, “aq më i madh do të jetë kërcënimi”, vlerëson shefi i diplomacisë kosovare.

Në këtë intervistë, ai ka folur edhe për Gjykatën Speciale, për të cilën ka përsëritur se vendimi nuk ka qenë i lehtë. Duke iu përgjigjur pyetjes, nëse edhe anëtarë të PDK-së mund të jenë të akuzuar, ai ka thënë se kjo nuk ka të bëjë me personat, por me procesin që ofron një mundësi.

Top Channel