Leo Messi në version agresiv, i vë duart në fyt kundërshtarit

06/08/2015 00:00

Gjatë ndeshjes së vlefshme për turneun veror Gamper mes Barcelonës dhe Romës, u pa një skenë jo e zakonshme me protagonist Leo Messin. Ylli i skuadrës katalanase, në minutën e 34-t të ndeshjes, i vuri duart në fyt mbrojtësit të Romës, Yanga Mbiwa.

Në një aksion të ndaluar nga arbitri, Messi vazhdoi driblimin e tij ndaj lojtarit afrikan të Romës dhe ky i fundit i tha diçka argjentinasit, i cili reagoi duke përplasur kokën fillimisht me kundërshtarin e më pas duke i vënë duart në fyt.

Ishin lojtarët e tjerë të të dyja skuadrave që qetësuan situatën, ndërkohë që Messi dhe Yanga-Mbiwa u ndëshkuan me karton të verdhë.

Ndeshja mes Barcelonës dhe Romës përfundoi me rezultatin 3-0 për spanjollët. Golat e ndeshjes u shënuan nga Neymar, Messi dhe Rakitic.

Top Channel