Estonia merret shpesh si shembull kur flitet për teknologjinë dhe vendosjen e saj në shërbim të qytetarëve.
E në përputhje me këtë imazh që ka krijuar në mbarë botën, vendi i vogël i ftohtë në skajet e Europës, ka prezantuar së fundmi e-residency.
Përmes kësaj nisme, Talini u ofron të gjithë atyre personave në mbarë botën që duan të marrin “shtetësinë dixhitale” si estonezë mundësinë e realizimit të kësaj me vetëm një klikim.
“Kemi mundësinë që të ndihmojmë sipërmarrësit që të rrisin biznesin e tyre, e ndërkohë tërheqim në vendin tonë investime të reja”, thotë Taavi Kotk, kreu i informacionit në qeverinë estoneze.
Objektivi i nismës është tërheqja e sa më shumë investitorëve duke u garantuar atyre lehtësi dhe reduktim burokracish në maksimum, sepse kushdo që ka një e-residency, mund të hapë një biznes në Estoni dhe t’i nënshtrohet të gjitha të drejtave dhe detyrimeve që ka një sipërmarrës vendas.
Deri më tani numri i personave që kanë marrë e-residency ka shkuar pak më shumë se 3 mijë, ndërkohë që synimi i autoriteteve estoneze është që brenda vitit 2025 numri i tyre të tejkalojë 10 milionë.
Top Channel
