ISIS trondit sërish botën, ekzekuton 8 shiitë. Kërcënon edhe Assadin

Një tjetër video është hedhur në internet, ku luftëtarët e grupit ekstremist kryejnë aktin barbar në provincën siriane të Hama-s. Me sy dhe duar të lidhura, shiitët u dërguan në një fushë, ku iu dorëzuan xhelatëve.

Një person i veshur me uniformë të zezë u kaloi  thikat militantëve, para se të vriteshin pengjet. Videoja është shpërndarë në mediat sociale, ndërsa Observatori Sirian për të Drejtat e Njeriut, me seli në Londër, mendon se filmimi është autentik.

Një luftëtar i ISIS-it, që shihet duke folur në video, i quajti pengjet si “të pafè të ndyrë”, ndërsa theksoi se fushata ushtarake kundër Shtetit Islamik nuk do të bëjë gjë tjetër, veçse do ta forcojë grupin edhe më shumë.

Por shtypi i huaj pretendon se, këtë radhë organizata ekstremiste i ka drejtuar një kërcënim edhe presidentit sirian Bashar al-Assad. “Shpatat tona, dashtë Zoti, shumë shpejt do të mbërrijnë dhe te nuseiritë e aleatët e tyre”, duket të ketë thënë personi që flet në video, duke iu referuar kështu sipas gjasave kreut të shtetit sirian dhe partisë së tij.

Fjala “nuseiri” është një term përçmues, i përdorur zakonisht në rastet e referimit ndaj sektit alavit, që është një nëndegë e Islamit shiit, e të cilit i përket edhe vetë Assadi.

Top Channel