Lame: Qindra institucione publike me ndërtime pa leje

Lista e këtyre objekteve nis nga vetë Drejtoria e ALUIZNI-t, e Qarkut Tiranë. Por kreu i Agjencisë, Artan Lame thotë se një pjesë e këtyre institucioneve, jo vetëm kanë shkelur ligjin, por nuk janë përfshirë as në procesin e vetëdeklarimit për legalizim, të mbyllur në fund të muajit janar.

“Është e paimagjinueshme, që një shtet të ndërtojë pa leje, në një kohë kur ka ligje që dënojnë qytetarët, që e bëjnë një gjë të tillë. Në qoftë se një pjesë e këtyre institucioneve, vërtet kanë ndërtuar pa leje, por më pas u përfshinë në procesin e vetëdeklarimeve dhe legalizimeve, rezultojnë edhe një numër shumë i madh institucionesh, të cilat me gjithë kërkesën me shkrim të bërë drejtpërdrejt ndaj tyre, nuk e vranë mendjen t’u nënshtrohen ligjeve të shtetit”, tha Artan Lame.

Këto institucione variojnë nga ato të administratës qendrore; ministri, institucione varësie, agjenci, institucione arsimore, drejtori rajonale; duke vazhduar pastaj me institucione të qeverisjes vendore, komuna e bashki.

“Të gjendur përpara kësaj situate, unë u bëj thirrje edhe njëherë – tashmë jo mijëra qytetarëve, që iu bindën ligjit – por institucioneve shtetërore, që ta zbatojnë atë. Ne do të bëjmë një ndryshim në aktet nënligjore për ta mundësuar një gjë të tillë, por është e domosdoshme që edhe këto institucione të mos bëjnë asgjë më shumë, sesa zbatimin e detyrimeve ligjore”, tha Artan Lame.

Në fund të deklaratës, Lame shprehu edhe njëherë ambicien e tij për kandidaturën e Bashkisë së Tiranës.

“Vazhdojnë të më hanë duart. E kam bërë publike sa herë jam pyetur për këtë, sepse jam qytetar i këtij qyteti. Kam bindjen që për këtë do të ketë një diskutim publik brenda radhëve tona, për nxjerrjen e kandidaturave në fund”, deklaroi Lame.

Top Channel