Për të eliminuar aksidentet rrugore në një zonë të papërfunduar, në
segmentin rrugor nga “Komuna e Parisit” deri tek rruga e re
Tiranë-Elbasan, Autoriteti Rrugor Shqiptar ka miratuar kërkesën e
pjesshme të Sipërmarrësit dhe Mbikëqyrësit të punimeve për një devijim
të përkohshëm të trafikut në këtë segment, deri në marrjen e masave
shtesë të sigurisë dhe sinjalistikës.
ARRSH bëri të ditur sot se, kërkesat e vazhdueshme për mbylljen e gjithë trafikut në gjatësinë e plotë të këtij segmenti (“Komuna e Parisit”-Rruga e Re Tiranë-Elbasan) duke nisur nga Mbikalimi i Saukut deri në rrugën “Komuna e Parisit” u morën parasysh. Ndaj, u vendos për mbyllje të pjesshme të qarkullimit të automjeteve vetëm në segmentin e fundit, i vlerësuar si zona më e rrezikshme.
Skema e miratuar edhe nga sektori i sinjalistikës paraqet elementët e sinjalistikës rrugore, sipas Kodit Rrugor për bllokimin e hyrjeve dhe daljeve në fillim të kantierit të punimeve, konkretisht:
-Bllokimi i hyrje/daljeve në kantier në CS7 në rrugën “Komuna e Parisit” (segmenti ku bëhet lidhja e këtij objekti me objektin tjetër “Ndërtim Unaza e Re e Tiranës” si dhe me segmentin “Komuna e Parisit”-Shkolla Teknologjike”), e konsideruar si zonë e rrezikshme për aksidente të mundshme;
-Bllokimi i hyrje/daljeve në kantier tek rrethrrotullimi i nënkalimit (pranë digës së Liqenit Artificial);
-Devijim i trafikut në rrugën Elbasan-Tiranë, tek dalja e nënkalimit (pranë digës së Liqenit Artificial).
Top Channel
