Si merret një patentë pa kryer asnjë ditë kurs? Emisioni investigativ “Fiks Fare” vijoi të enjten transmetimin e fakteve mbi zinxhirin e sekserëve që të ndihmojnë për t’u pajisur me patentë pa bërë asnjë ditë kurs dhe asnjë ditë praktikë, por duke paguar dyfishin e çmimit.
Gazetari i Fiksit u paraqit në autoshkollën A&B në Shkodër ku u interesua për t’u pajisur me patentë për kamion pa kryer asnjë ditë kurs, por thjesht duke ofruar para. Në ditën e provimit të teorisë dhe praktikës, “kursanti” flet me pronarin e autoshkollës “Jaku” para se të hipë në mjet për provimin.
“Mua më ka dhënë 250 000 (të vjetra) për të gjitha. Unë të mbaroj punë. Mos e vrit mendjen për t’i dhënë makinës, më ke mua aty”, thotë pronari i autoshkollës “Jaku”.
Kur “kursanti” hipën në kamion, anëtari i komisionit të patentave i thotë që të ecë ngadalë pasi e kupton që personi që kërkon të marrë patentë kamioni nuk ia ka idenë drejtimit të tij. Pasi bën vetëm pak metra me ndihmën e anëtarit të komisionit që i thotë si të veprojë gjatë gjithë kohës, provimi përfundon me “sukses” dhe patenta merret.
Për këtë çështje ka reaguar edhe drejtori i Shërbimit të Transportit Rrugor, Ylli Spahiu: “Ju përshëndes për ndjekjen e këtij problemi. Autoshkolla që ka dalë në emisionin “Fiks Fare” nuk është e licensuar nga ana jonë. Ne nuk ia kemi dhënë të drejtën e ushtrimit të aktivitetit. Kjo është një autoshkollë që bën pjesën e sekserit. Cështja është në Prokurori.”
Top Channel
