Të maskuar me të zeza, dy persona të armatosur me kallashnikovë sulmuan ambjentet e redaksisë së revistës satirike “Charlie Hebdo” në Paris, duke vrarë 12 persona dhe plagosur 8 të tjerë.
Viktima mbetën 10 pjesëtarë të stafit të revistës, mes tyre drejtori i saj, Stephan Charbonnier, si dhe tre prej karikaturistëve më të rëndësishëm të saj: Cabu, Tignous dhe Georges Wolinski. Po ashtu u ekzekutuan edhe 2 punonjës policie.
Mësohet se fjalët e fundit të drejtorit të revistës ishin: “Unë më mirë vdes ballëlartë sesa të jetoj i gjunjëzuar”.
Gjatë orëve të mbrëmjes mediat franceze kanë bërë të ditur se policia ka arritur të identifikojë dy autorët e kësaj ngjarje të rëndë. Sipas policisë 2 ekzekutorët janë vëllezërit franko-algjerianë, Said Kouachi dhe Chérif Kouachi, përkatësisht 32 dhe 34 vjeç, ndërsa në kërkim është shpallur edhe një 18 vjeçar që mendohet se është bashkëpunëtori i tyre.
Teksa të shtënat vazhdonin me breshëri, dhjetëra punonjës u munduan t’i shpëtonin zjarrit. Dëshmitarët në vendin e ngjarjes tregojnë se atentatorët morën drejtimin për në veri-lindje të qytetit. Aty ku pikërisht pas disa orësh policia franceze gjeti një makinë tip “Citroen” të braktisur, të ngjashme me atë që atentatorët e përdorën si mjet për t’u larguar.
Sipas dëshmive, personat e maskuar flisnin shumë mirë frengjisht dhe zjarrin e hapën duke thirrur “Do t’ia marrim hakun Profetit” dhe “Allahu Akbar”. Sipas karikaturistes Coco, atentatorët përveç se flisnin mirë gjuhën deklaruan edhe se ishin të Al Kaedës.
Presidenti Francois Hollande e etiketoi pa asnjë dyshim ngjarjen si sulm terrorist. “Ne e dinim se ishim të kërcënuar, sikurse dhe vendet e tjera të botës. Kërcënimi i sotëm erdhi sepse ne jemi vend i lirisë”, deklaroi Hollande, i cili mbrëmjen e së mërkurës njoftoi se e enjtja do të jetë ditë zije kombëtare në Francë.
Sulmi vjen mes tensioneve në rritje në Francë si pasojë e rritjes së ndikimit islamik në shoqëri. Mendohet se revista franceze u kthye në qendrën e sulmit, pasi “Charlie Hebdo” njihet për shkrimet e saj satirike.
Rreth 15 minuta përpara sulmit, gazeta kishte publikuar në profilin e saj në “Twitter” një karikaturë të liderit të ISIS, Abu Bakr al-Baghdadi. Por tre vite më parë ajo kishte realizuar karikaturën e profetit Muhamed, akt ky i cili solli reagime të forta në vend e jashtë tij.
Ndërkaq, Parisi është blinduar nga forca të shumta policore, të cilat po kryejnë një gjueti të mirëfilltë për kapjen e autorëve. Ndërsa përtej Antlantikut, Departamenti i Policisë së Nju Jorkut ka vendosur oficerë prane Konsullatës Franceze atje.
Kryeministri Manuel Valls ka ngritur në maksimum nivelin e sigurisë në Francë, duke përforcuar edhe masat e sigurisë në zyrat e mediave, në dyqanet e mëdha, në qendrat fetare, si edhe në transportin publik.
Top Channel