Korea e Veriut nuk mohon sulmin ndaj “Sony”

“Sony” ka ndërmarrë një hetim të gjerë pasi kompjuterët e tij u sulmuan dhe filma të pashfaqur ende në kinema u hodhën në faqe të ndryshme interneti.

I pyetur nëse ishte e përfshirë në sulm, një zëdhënës i qeverisë koreano-veriore u përgjigj: “Prisni dhe do ta shihni”.

Në qershor Korea e Veriut u ankua tek Kombet e Bashkuara dhe tek Shtetet e Bashkuara për filmin komedi mbi liderin e saj, “Intervista”.

Në film, aktorët Seth Rogen dhe James Franco interpretojnë dy reporterë të cilëve u mundësohet një intervistë me Kim Jong un. Menjëherë ndërhyn CIA, që angazhon gazetarët për ta vrarë liderin.

Regjimi i Penianit e ka cilësuar filmin si një “akt lufte” dhe një “sponsorizim të neveritshëm të terrorizmit”, dhe i ka kërkuar Uashingtonit dhe OKB-së që ta bllokojnë atë.

Sistemi kompjuterik i “Sony Pictures” ra javën e kaluar dhe hakerat publikuan online një numër filmash ende të pashfaqur në kinema.

Mes titujve është një riprodhim i filmit klasik “Annie”, që nuk do të shfaqet në ekranin e madh para 19 dhjetorit. Megjithatë, filmi për liderin korean nuk shfaqet mes atyre të piratuar.

“Forcat armike po lidhin gjithçka me Korenë e Veriut. Unë ju këshilloj vetëm të prisni dhe do të shihni”, u përgjigj zëdhënësi i qeverisë së Penianit.

Ditën e hënë “Sony Pictures” deklaroi se kishte riparuar një seri shërbimesh të rëndësishme, që ishte detyruar të pezullonte për shkak të sulmit.

Top Channel