Kongresi amerikan nisi punën pas zgjedhjeve të javës së kaluar, ku republikanët morën kontrollin e Senatit dhe zgjeruan shumicën në Dhomën e Përfaqësuesve.
Shumë nga kundërshtarët më të ashpër të presidentit Barack Obama po përgatiten të marrin pozicione të fuqishme ne Senatin që ka qenë nën kontrollin e demokratëve që nga viti 2007.
Republikani më i lartë atje, Mitch McConnell do të bëhet udhëheqës i shumicës dhe do të vendosë se cilat projektligje mund të hidhen për shqyrtim.
Shumë prej tyre duhet të miratohen paraprakisht nga komisionet e Senatit, të cilat do të kenë kryetarë republikanë.
Komisioni i Politikës së Jashtme do të drejtohet nga senatori Bob Corker, një kritik i hapur i planit të administratës Obama për të luftuar ekstremistët e grupit Shteti Islamik në Irak dhe Siri.
Të premten e kaluar, presidenti Obama priti në Shtëpinë e Bardhë krerët e republikanëve dhe ata të demokratëve, për të eksploruar rrugët e kompromisit pas 5 vjet mëri politike.
Në takimin me presidentin u bashkuan 16 ligjvënës, përfshirë atë që tashmë është lideri i mazhorancës në Senat, Mitch McConnell dhe kreu i grupit të republikanëve, John Boehner.
“Populli amerikan dëshiron të shohë punën e bërë këtu në Uashington”, tha Obama gjatë komunikimit me mysafirët e tij.
“Ata janë të frustruar nga ngërçi, duan të shohin bashkëpunim dhe unë mendoj se të gjithë ne, sidomos unë, kemi përgjegjësinë që të përpiqemi dhe të realizojmë kërkesat e tyre”, vijoi presidenti.
Top Channel
