Bayerni, ende i uritur për fitore ndaj Romës

Bavarezët do të udhëtojnë drejt Frankfurtit, për t’u ndeshur me Eintrachtin të shtunën, për Bundesligën, me synimin për 3 pikë të tjera në transfertë, por deri atëherë të besuarit e Pep Guardiolës do të kërkojnë një tjetër fitore, këtë herë në Champions, ndaj Romës, 3-pikësh që do t’u siguronte atyre kreun e grupit E pas vetëm 4 ndeshjesh në grup.

“Jemi ende tepër të uritur për suksese dhe shumë ambiciozë”, u shpreh David Alaba në konferencën për shtyp në qendrën mediatike “Sabener Strasse”, 2 ditë përpara përballjes së të mërkurës në Europë.

Bayerni, i cili zhvilloi një seancë stërvitore me dyer të mbyllura teksa niste përgatitjet për ndeshjen me Romën pasditen e së hënës, e ka fshirë nga kujtesa atë triumf sensacional 7-1 në kryeqytetin italian, dy javë më parë.

“Roma mbetet sërish një skuadër e fortë, – këmbëngul Alaba. – Ata vijnë të luajnë ndaj nesh për të kërkuar pikë, madje kanë edhe lojtarë të aftë për të vendosur fatet e një ndeshjeje edhe të vetëm”.

Gjermanët e dinë se Francesco Totti dhe kolegët e tij do të bëjnë gjithçka të mundshme për të larguar kujtimin e keq të asaj humbjeje të tmerrshme për ta.

Top Channel