Papa flet për vizitën në Shqipëri

Pasi falenderoi për pritjen, si popullin shqiptar ashtu edhe autoritetet e vendit, ai i përshkroi besimtarëve të mbledhur në shesh atë çka gjeti në Shqipëri.

“Kjo vizitë lindi nga dëshira për të shkuar në një vend, që, pasi u shtyp për një kohë të gjatë nga një regjim ateist e çnjerëzor, po përjeton përvojën e bashkëjetesës paqësore ndërmjet feve. M’u duk shumë e rëndësishme ta inkurajoj në këtë udhë, që ta vazhdojë me këmbëngulje e të thellohet në të gjitha aspektet, për të mirën e përbashkët. Për këtë, në qendër të udhëtimit, qe një takim ndërfetar, në të cilin pata mundësinë të shoh me kënaqësi të thellë se bashkëjetesa paqësore dhe e frytshme ndërmjet njerëzve e bashkësive, që u përkasin feve të ndryshme, jo vetëm është e dëshirueshme, por është konkretisht e mundur dhe e zbatueshme në praktikë. Ata e praktikojnë!
Duke përshkuar udhët kryesore të Tiranës, që nga aeroporti çojnë në sheshin qendror, munda të shoh portretet e dyzet meshtarëve të vrarë gjatë diktaturës komuniste, për të cilët është nisur çështja e lumnimit. Vërtet, sot, Shqipëria është shembull, jo vetëm për rilindjen e Kishës, por edhe për bashkëjetesën paqësore ndërmjet feve.  Falenderoj edhe një herë Zotin, sepse, me këtë udhëtim, më dha mundësinë të takohem me një popull të guximshëm e të fortë, që nuk u përkul para dhimbjes. Vëllezërve e motrave të Shqipërisë u përsëris ftesën për të pasur guximin e së mirës, për të ndërtuar të tashmen e të ardhmen në vendin e tyre e në Europë. Do të doja që të gjithë ne ta përshëndesim këtë popull të guximshëm, punëtor, që në paqe, kërkon bashkimin”, u shpreh Papa Françesku.

Përpara se të mbyllte audiencën, Papa Bergoglio i kërkoi të pranishmëve që të bëjnë një duartrokitje të fortë për popullin shqiptar. Popull, që ai e cilësoi si të guximshëm punëtor dhe që në paqe kërkon bashkimin. Dhe 300 mijë besimtarët e mbledhur në shesh ja plotësuan menjëherë dëshirën Atit të Shenjtë, duke përshëndetur kështu idealisht shqiptarët dhe Shqipërinë.

Top Channel