Champions, Napoli dhe Arsenali nuk arrijnë të fitojnë

Pavarësisht dëshirës dhe grintës së treguar gjatë gjithë 90 minutave italianët nuk kanë arritur të sigurojnë një fitore, duke e mbyllur ndeshjen në barazim 1-1.

Të parët që kaluan në avantazh ishin spanjollët e Bilbaos, të cilët arritën të shënonin një gol mjaft të rëndësishëm në minutën e 41-t të pjesës së parë.

Në 45 minutat e dyta, Napoli ishte më kërkues. Trajneri Benitez hodhi në fushën e lojës edhe belgun Dries Mertens, i cili i dha një ritëm tjetër lojës, me shpejtësinë dhe teknikën e tij.

Vendasit arritën të barazonin shifrat me sulmuesin kryesor të tyre, Hiaguain, në minutën e 68-të. Deri në fund të takimit, të besuarit e Benitez kërkuan me ngulm golin e fitore, por nuk mundën të shënonin, pavarësisht rasteve, të cilat nuk munguan.

Tashmë për italianët bëhet e vështirë kalimi për në fazën e grupeve, duke pasur parasysh se kundërshtari është mjaft i rrezikshëm në fushën e tij, madje ka shënuar edhe në fushën kundërshtare. Napolit i duhet patjetër një fitore ose një barazim me gola për të vazhduar për më tej.

Në Turqi, Beshiktashi priti londinezët e Arsenalit, edhe ky çift dhuroi një 90 minutësh mjaft interesant edhe pse u mbyll në barazim 0-0.

Vendasit zhvilluan një ndeshje mjaft të mirë, duke e mbajtur nën presion gjatë gjithë kohës kundërshtarin, por pa mundur të shënonin. Venger kishte zgjedhur të qëndronte në pritje dhe ta godiste kundërshtarin me kundërsulm, por nuk ia doli.

Lojtari i Arsenalit Aaron Ramsey u ndëshkua me karton të kuq në minutën e 80 të ndeshjen. Edhe këtu, po ashtu si në sfidën mes Napolit dhe Bilbaos, mbetet gjithçka e hapur për ndeshjen e kthimit. Kujtojmë që në 18 vitet që Venger ka drejtuar londinezët ka arritur plot 17 herë fazën e grupeve të Champions.

Hap të rëndësishëm për kalimin e kësaj faze kanë hedhur gjermanët e Leverkusen, të cilët arritën të fitonin 2-3 ndaj FC Kobenhavn, në Danimarkë.

Në fushën e tyre, arritën të fitonin edhe Salzburg ndaj Malmo, 2-1 dhe Steaua e Bukureshtit 1-0 ndaj Ludogorets.

Top Channel