PD ka vazhduar edhe gjatë së hënës me akuzat në lidhje me skandalin e Sarandës, ku mëkëmbësi i deputetit Kokëdhima, siç thonë, ka kërkuar favor seksual me një vajzë të mitur në këmbim të një vendi pune, duke drejtuar gishtin e fajit ndaj oligarkisë në pushtet, Rama-Meta-Kokëdhima.
“Skandali i Sarandës në zyrën e Partisë Socialiste është mirëfilli tregues i oligarkisë në veprim, Rama-Meta-Kokëdhima, që funksionon kështu. Në të gjitha zyrat e Partisë në Shqipëri, në të gjithë zyrat e administratës, paguhet në këmbim të shërbimit, në këmbim të punësimit. Çirakët e oligarkëve, që kanë ngritur rrjetin e merimangës në gjithë vendin, shpërdorojnë pushtetin dhe kërkojnë vazhdimisht favore, parà, interesa, deri te realizimi i dëshirave perverse që kanë”, ka akuzuar në deklaratën e tij për shtyp deputeti Oerd Bylykbashi.
“Këta oligarkë e kanë marrë me kohë licencën për të poshtëruar qytetarët e vendit, qysh kur vendosën aleancën parazgjedhore. Licenca për shpërdorim në çdo drejtim është dhënë nga Edi Rama, Ilir Meta, e Koço Kokëdhima, që kur ata caktojnë drejtorë trafikantët e drogës, caktojnë në krye të Këshillit të Qarkut të akuzuarin për rrëmbim fëmije, fusin në Parlament të dënuarin për prostitucion. Prandaj, etika dhe morali i kësaj qeverie ka rënë, përpara se oligarkët të vijnë në pushtet. Ata janë ngjizur në mëkat që në krye të herës dhe nuk mund të presësh tjetër përveç abuzimit, kudo e me këdo”, është shprehur më tej deputeti i PD.
Top Channel
