Polonia ndihmoi në torturat CIA-s

Gjyqtarët deklaruan se Polonia bashkëpunoi për transfertat ilegale të të burgosurve në vitet 2002-2003, duke lejuar që të dyshuarit të merreshin në pyetje në territorin e saj.

Ky është rasti i parë i lidhur me burgjet sekrete të CIA-s në Poloni.

Autoritetet polake e cilësuan vendimin si “të turpshëm për vendin e tyre”, por gjithashtu të “parakohshëm” sepse hetimi i Polonisë mbi dyshimet për burgjet sekrete është ende në vazhdim.

Gjykata vendosi se trajtimi i të dyshuarve për terrorizëm që janë marrë në pyetje në territorin polak ka kaluar në torturë.

Trupa gjyqësore përmendi rastet e Abu Zubaydah, një palestinez i arrestuar në Pakistan dhe Abd al Rahim al Nashiri, një saudit i arrestuar në Dubai.

Dy personat në fjalë, që dyshoheshin si anëtarë të Al Kaedës, aktualisht ndodhen të burgosur në qendrën e Guantanamos në Kubë.

Ata i ishin ankuar gjykatës se ishin torturuar në një burg të menaxhuar nga amerikanët në Poloni, në afërsi të fshatit Stare Kiejkuti, ku Nashiri ishte mbajtur për 6 muaj dhe Abu Zubaydah për nëntë.

Gjykata evropiane, në një komunikatë për shtyp të publikuar lidhur me këtë çështje, deklaroi se shteti polak duhet të mbahet përgjegjës për shkeljen e të drejtave të njeriut në territorin e tij.

Në komunikatë thuhet gjithashtu se, shteti polak ka qenë në dijeni të transferimit të të dyshuarve, në ardhje dhe në ikje nga territori i tij.

Top Channel