Shqipëria është pranë zyrtarizimit të statusit të vendit kandidat për në BE. Këtë herë siguria që vjen nga Brukseli është edhe më e madhe, pasi edhe Çekia, vend që përmes mediave dha sinjale shqetësuese bllokimi, është bashkuar me qëndrimin pro të vendeve të tjera anëtare duke lejuar vijimin e axhendës normale të diplomacisë shqiptare.
Ndonëse në Tel Aviv, ku ndodhet për një vzitë zyrtare, ministri i Jashtëm Ditmir Bushati nuk i ka ndaluar komunikimet me homologët e tij të Bashkimit Evropian.
Në takimet me zyrtarë izraelitë, shefi i diplomacisë shqiptare ka vendosur si kryefjalë pritshmërinë e vendit tonë për marrjen e statusit të vendit kandidat.
Përveç çështjes së statusit, në takimet me homologun e tij, me ministren e Drejtësisë, drejtuesit dhe deputetë të Parlamentit të këtij vendi u vu theksi tek rritja e bashkëpunimit politik dhe ekonomik.
Ndërsa përpara Këshillit Botëror Hebre dhe Këshillit Izraelit për Marrëdhëniet me Jashtë u evidentuan lidhjet e ngushta historike që bashkojnë popullin shqiptar dhe popullin hebre, të cilat kulmojnë me aktin e shpëtimit kolektiv të hebrenjve në Shqipëri gjatë Luftës së Dytë Botërore.
Fakt që nga “The Jerusalem Post”, në shkrimin për vizitën e ministrit shqiptar, është evidentuar me titullin: “Shqipëria, i vetmi vend europian ku pas Holokaustit hebrejtë ishin më të shumtë në numër se përpara tij”.
Citim ky i marrë nga fjala e ministrit Bushati gjatë homazheve në memorialin e viktimave të Holokaustit, së bashku me garancinë e tij se në Shqipëri nuk ka pasur dhe nuk do të ketë histori të anti-semitizmit.
“The Jerusalem Post” shkruan se, “këtë frymë Shqipëria do ta përçojë edhe në Unionin Europian, prej nga pret vendimin këtë javë për marrjen e statusit të vendit kandidat”. Vendim që do ta gjejë ministrin tonë të Jashtëm në rrugën e kthimit nga Izraeli në Bruksel.
Top Channel
