Axhenda e Parlamentit të ri Europian

Nëse Parlamenti dhe kryetarët e shteteve e qeverive do të kenë rënë në ujdi deri atëherë, për një kandidat, kjo është e paqartë.

Mospajtimet, mbi marrëveshjen e planifikuar të tregtisë së lirë me Shtetet e Bashkuara, ishin temë e nxehtë e fushatës elektorale për zgjedhjet europiane.

Ndërkohë që përkrahësit e një zone të lirë tregtie, për 800 milionë qytetarë, shpresojnë në rigjallërimin e tregtisë mes dy fuqive ekonomike, kundërshtarët i druhen zbutjes së standardeve të rrepta europiane, e produktet ushqimore të manipuluara gjenetikisht jane vetëm njëri prej shembujve ilustrues të frikës së tyre.

Ashtu siç ndodh rëndom në çështjet e tregtisë, negociatat me Uashingtonin i kryen vetëm Komisioni Europian. Mandatin për këtë e ka marrë Qershorin e 2013-s. Palët fillimisht planifikonin negociimin përfundimtar, deri në fund të këtij viti, por duket se afati do të zgjatet deri në 2015-n.

Deputetët e rinj kanë shumë më tepër kohë në dispozicion, për të ushtruar ndikim në negociata dhe marrëveshja nuk mund të hyjë në fuqi përveç se me miratimin e tyre. Por, rritja e mbështetjes për partitë e ekstremit të djathtë e të majtë, kundërshtare të bisedimeve të tregtisë së lirë, i shton ndjeshëm mundësitë e kompromentimit të negociatave.

Ekziston një aleancë e pazakontë mes ekstremeve, kur vjen fjala te marrëveshja e tregtisë së lirë, – thotë Mats Persson, drejtues i “Think Tank”-ut “Open Europe”.

Qendra e gravitetit në Parlamentin e ri europian, sipas tij, tanimë do të spostohet më shumë drejt proteksionizmit. Populistët nuk mund ta bllokojnë marrëveshjen, por miratimi i saj ka për të qenë shumë më i vështirë, e do të varet në masë të madhe nga krijimi i një koalicioni të gjerë të partive të qendrës.

Top Channel