“Mos ejani në Itali të vuani urie”. Është ky një prej spoteve zgjedhorë
të realizuar nga këshilltari i Lidhjes së Veriut Angelo Ciocca për
zgjedhjet europianë të 25 majit.
E veçanta është se ka përdorur pesë emigrantë për të përcjellë mesazhin e tij kundër emigracionit të dhënë si në gjuhë të huaja ashtu edhe në italisht. Pesë emigrantë nga Angola, Sri Sanka, India, Pakistani dhe vendet arabe këshillojnë bashkatdhetarët e tyre që të mos i besojnë skafistëve sepse janë vrarës dhe të mos vijnë në Itali, ku i pret uria e mjerimi.
Kandidati Angelo Ciocca kërkon votën e atyre që janë dakort me politikën kundër emigracionit. Sipas politikanit të Lidhjes së Veriut, mesazhi i dhënë nga vetë emigrantët e rregullt duhet të ketë më shumë efekt. Një stretegji e ndjekur më parë edhe në Zvicër e Australi.
Por spotet në fjalë përzjejnë emigracionin e rregullt dhe atë ilegal, emigrantët që vijnë në Itali për të punuar rregullisht me ata që i largohen konflikteve e persekutimeve për të shpëtuar jetën. E zor se këta të fundit i ndal mesazhi sado i fortë i pesë emigrantëve dhe i një politikani të djathtë të Lidhjes së Veriut, një forcë politike e njohur për qëndrimin e saj shumë të ashpër në fushën e emigracionit.
Top Channel
