Sebastian Vettel, katër herë kampion në Formulën 1, deklaroi në një intervistë për revistën gjermane ‘Focus’ se vazhdon të jetë i shokuar nga aksidenti me ski që pësoi Michael Schumacher në dhjetorin e vitit të kaluar.
Piloti gjerman i Red Bullit pranoi se sa herë që e mendon atë aksident, trembet duke kuptuar se “sa shpejt mund të ndryshojnë gjërat në jetë”.
“E kam të vështirë të flas, jam ende i shokuar”, tha Vettel.
Lajmet e fundit mbi Michael Schumacher, i cili ndodhet në komë të induktuar në spitalin e Grenobles, bënin të ditur se ish-piloti i Ferrarit është në gjendje kritike, por të qëndrueshme.
Ndërsa menaxherja e tij, Sabine Kehm, ka thënë në deklaratat e fundit publike të saj se “ka përmirësime të vogla”.
Top Channel
