Një nga “armiqtë” më premtues të Vladimir Putin në Rusi ka fituar një shtyrje të papritur gjyqësore, të hënën, kur një gjykatë e Moskës hodhi dyshime mbi një çështje vjedhjeje, të cilën ai e konsideron si një hakmarrje të presidentit për aktivitetin e tij, duke e dërguar mbrapsht në Prokurori për rishikim.
Vendimi nënkupton se gjyqi i dytë ndaj Alexei Navalny, i cili është aktualisht nën një vendim të pezulluar të një dënimi 5-vjeçar mbi një mashtrim të vitit 2013, do të shtyhet deri kur prokurorët të shmangin të metat në çështjen e tyre gjyqësore.
Por, sërish mbetet një presion i madh ndaj Navalny-t, i cili është nën arrest shtëpiak, pasi i ndalohet të kandidojë për poste publike për vite të tëra, për shkak të dënimit të tij. Një blogger i zjarrtë, i cili ndërtoi reputacionin e tij me një fushatë online kundër korrupsionit shtetëror, atij i ndalohet gjithashtu edhe të ketë akses në rrjete sociale, por janë mbështetësit e tij që postojnë në emër të tij.
Navalny tha se nuk kishte aspak dyshim që gjyqi do të vazhdojë më tej. “Gjykata dhe prokurorët, thjesht sa po tregohen super-të kujdesshëm”, është cituar të ketë thënë Navalny nga agjencia shtetërore e lajmeve “Rapsi”.
Navalny, një lider i protestave që shokuan Kremlinin në vitet 2011-12, mund të burgoset për shumë vite nëse shpallet fajtor, për vjedhjen e më shumë se 30 milionë rublave (832,700 dollarë) nga dy kompani, njëra prej të cilave filial i firmës franceze të kozmetikës, “Yves Rocher”. Ai dhe vëllai i tij Oleg, i cili akuzohet gjithashtu, kanë mohuar të jenë fajtorë.
Top Channel
