Real, vijon gjuetinë “Atletico-Barça”

06/04/2014 00:00

Barcelona dhe Atletico Madrid regjistruan të tjera fitore në La Liga, duke ruajtur diferencën prej 1 pike me njëra-tjetrën.

Në “Camp Nou”, Barca mundi Betis me rezultatin 3-1, në një ndeshje ku ajo nuk shfaqi formën e saj më të mirë. Pjesën e parë, katalanasit e mbyllën me avantazhin 1-0, me gol të shënuar nga Lionel Messi, pas një 11-metërshi të fituar nga Aleksis Sanchez.

Në të dytën, Betis e vuri shpesh herë në vështirësi mbrojtjen e Barcelonës dhe Pinto-n, por në momentin më të mirë të tyre skuadra e Gerardo Martino-s dyfishoi shifrat, falë autogolit të Jordi Figera-s. Pas 2 minutash Betis shkurtoi diferencën në 2-1, me Ruben Castro-n.

Kur kishin mbetur 5 minuta nga fundi i ndeshjes, arbitri akordoi një tjetër 11-metërsh në favor të Barcelonës; Messi gaboi në momentin e gjuajtjes, por e rikuperoi menjëherë gabimin.

Edhe Atletico Madrid vuajti jo pak për të fituar në “Vicente Calderon” me Villarreal-in. E kushtëzuar nga disa mungesa të rëndësishme, skuadra e Diego Pablo Simeone u mjaftua me golin e Raul Garsia-s, për të marrë 3 pikët që e lënë atë ende në vendin e parë të renditjes.

Në mbrëmje, Real Madrid nuk iu nda 2 skuadrave kryesuese. Skuadra e drejtuar nga Carlo Ancelotti kalon pa shumë probleme pengesën “Anoeta”, duke e mundur Real Sociedad-in me rezultatin e thellë 4-0.

Serinë e golave për madrilenët e hapi Illarramendi, në minutën e 43-të. Në të 67’-n, Gareth Bale shënoi një gol spektakolar, për t’i lënë më pas radhën Pepe-s dhe Alvaro Morata-s, që shënoi golin e katërt. Me këtë fitore, Real Madrid mban gjallë shpresat për titullin në Spanjë, pasi diferenca me Atletico-n mbetet 3 pikë, ndërsa me Barcelonën është vetëm 2 pikë.

Top Channel