Napoli ka mundur Romën duke lejuar kështu Juventusin të thellojë avantazhin në krye të renditjes së Serisë A dhe në të njëjtën kohë i është afruar kryeqytetasve të vendit të dytë.
Ndeshjen e vendosi një gol i Jose Callejon në minutën e 81. Me këtë fitore, Napoli e sheh veten vetëm 3 pikë larg Romës duke hapur luftën për vendin e dytë të klasifikimit.
Mbajtja e vendit të dytë do të jetë objektivi i vetëm i Romës pasi Juventusi është plot 14 pikë larg dhe mund të quhet që tani kampion i Italisë.
Roma luajti më mirë, Reina shpëtoi në tre raste portën e tij, por në pjesën e dytë rastet më të pastra i pati Napoli.
Juventusi mundi Fiorentinën me rezultatin e ngushtë 1-0 duke u hakmarrë kështu për humbjen 4-2 të fazës së parë. Goli për bardhezinjtë u shënua nga Kwadwo Asamoah.
Me të njëjtin rezultat fitoi edhe Interi ndaj Torinos. Rodrigo Palacio ishte ai që i dha tre pikët zikaltërve që tashmë e shohin veten vetëm 1 pikë larg Fiorentinës së vendit të katërt.
Në takimet e tjera të Serisë A u shënuan këto rezultate: Bologna-Sassuolo 0-0, Chievo-Genoa 2-1, Lazio-Atalanta 0-1, Parma-Verona 2-0 dhe Sampdoria-Livorno 4-2.
Top Channel