Miliarderi dhe senatori francez, Serge Dassault është marrë në pyetje nga policia franceze për akuzat e ngritura kundër tij për blerje votash.
Dassault dyshohet për blerje votash gjatë kohës kur drejtonte qytezën Corbeil-Essonnes nga viti 1995 deri në vitin 2009.
Imuniteti parlamentar e pengonte një hetim të tillë, por me kërkesën e vetë 88-vjeçarit Dassault imuniteti u hoq nga parlamenti francez më 12 shkurt.
Ai është senator i partisë së qendrës së djathtë. Ai kërkoi heqjen e imunitetit në mënyrë që të mbrojë veten ndaj akuzave dhe të vërtetojë se gjithë aktiviteti i tij si kryebashkiak ka qenë korrekt dhe brenda ligjeve, raporton gazeta “Le Monde”.
Me një pasuri prej 13 miliard eurosh, ai rënditet i katërti në listën e francezëve më të pasur. Ai njihet për lidhjet e tij me presidentët Sarkozy dhe Jacques Chirac.
Si biznesmen Dassault zotëron “Dassault Aviation”, një kompani prodhimi avionësh luftarakë dhe transporti, përfshirë këtu edhe bombarduesit “Rafale”.
Top Channel