Klosi: Situatë e rënduar e rrugëve

Por, Partia Socialiste ka reaguar përmes deputetit dhe sekretarit organizativ Blendi Klosi, i cili ka theksuar se qeveria aktuale ndodhet përpara një sfide të rëndësishme e cila, siç ai theksoi, është të ringrejë në këmbë një sistem të tërë investimesh rrugore të papërfunduara dhe të ndërtuara me cilësi të dobët dhe pa standarte, duke u bërë edhe rrezik për përdoruesit e saj.

“Do ishte shumë mirë sikur qeveria dhe Edi Rama t’i kishin gjetur të përfunduara këto rrugë dhe të mos gjenin malin me borxhe që i mbante të bllokuara të gjitha rrugët e lëna në mes të rrugëve. Do ishte mirë sikur të paktën këto projekte të ishin bërë me standarte europiane dhe paratë e shqiptarëve të mos ishin bërë “rrush e kumbulla” për shirita rrugësh që mund të quhen vetëm shtigje aksidentesh. Por, fatkeqësisht nuk ka ndodhur kështu dhe qeveria e kryeministri duhet të merren në radhë të parë me ndreqjen e gabimeve të rënda politike e financiare që janë bërë me kantierin e infrastrukturës”, tha Klosi.

Sipas zotit Klosi, shembulli më tipik i funksionimit të opozitës aktuale është ai që lidhet me kreun aktual të saj, sa i takon Rrugës së Elbasanit në hyrjen e saj në kryeqytet.

“Mjafton të shohësh këtë rrugë. Kryebashkiaku i premtoi qytetarëve se nuk do të merrej me politikë, por vetëm me qytetin, por jo vetëm që nuk e mbajti premtimin, por i ra me top Bashkisë për t’u bërë top i Saliut në parti. Kjo arterie kryesore e Tiranës u la për dy vjet si gërmadhë e tani thonë “mos e prekni atë rrugë se e kemi nisur dhe donim ta bënim ne”. Askush nuk mund të marrë seriozisht këta njerëz të dështuar.”

Reagimi i Partisë Demokratike

Pas këtyre deklaratave, reagoi edhe Partia Demokratike duke theksuar se qytetarër e Tiranës nuk e harrojnë “të djeshmen e betonit klientelist dhe të sotmen e bllokimit të buxhetit të banesave sociale”.

“Për turpin e tij, kryesocialisti nuk gjeti sot një minutë kohë t’u shprehë ngushëllime familjarëve të viktimave të aksidenteve të djeshme tragjike. Për faqen e tij të zezë e përdori tragjedinë për të sulmuar opozitën e Bashkinë. Ish kryebashkiakut i kujtojmë se qytetarët e Tiranës nuk harrojnë as të djeshmen e betonit klientelist dhe as të sotmen e bllokimit të buxhetit të banesave sociale. Nuk e fsheh dot përgjegjësinë për krizën ekonomike dhe të sigurisë ku e ka futur vendin me pusulla antiopozitare dhe luftën politike që i ka shpallur Bashkisë së Tiranës dhe opozitës.”

Top Channel