Senati belg ka votuar në favor të përfshirjes së fëmijëve me sëmundje të pashërueshme në ligjin e eutanazisë.
Senati votoi me 50 vota pro kundrejt 17 kundër në favor të legjislacionit, që kundërshtohet nga liderët fetarë në Belgjikë.
Projektligji synon t’u lejojë fëmijëve të kërkojnë aplikimin e eutanazisë, nëse sëmundja e tyre është e përhershme, ndjejnë dhimbje të forta dhe nuk kanë mundësi mjekimi.
Tani ai do të shkojë në dhomën e ulët të Parlamentit, ku korrespondentët e mediave ndërkombëtare thonë se ka shumë gjasa që të aprovohet.
Belgjika miratoi një ligj që dekriminalizonte eutanazinë për të sëmurët mbi moshën 18-vjeçare në vitin 2002. Ndërsa projekti aktual propozon që Belgjika të bëhet vendi i parë në botë që të heqë çdo limit moshe për praktikimin e saj.
Megjithatë janë disa kushte që duhet të përmbushen:
A: Pacienti duhet të jetë i ndërgjegjshëm për vendimin dhe të kuptojë domethënien e eutanazisë;
B: Kërkesa duhet të aprovohet nga prindërit e fëmijës dhe ekipi mjekësor;
C: Sëmundja e pacientit duhet të jetë e përhershme;
D: Pacienti duhet të ndjejë dhimbje të forta;
E: Kërkesa të bëhet kur nuk ka mjekim për të lehtësuar gjendjen e pacientit.
Në nëntor, 16 mjekë pediatër u bënë thirrje ligjvënësve në Belgjikë që të aprovojnë legjilacionin, përmes një letre të hapur.
Top Channel