Kryeministrja tajlandeze, Yingluck Shinawatra, i ka mbijetuar një mocioni mosbesimi në Parlament, pas protestave masive në kryeqytetin Bangkok.
Mocioni u kërkua nga partia Demokratike në opozitë, por partia e zonjës Yingluck, “Pheu Thai” ka mazhorancën në legjislativ, ndaj dhe e votoi kundër atë me 297 vota kundër dhe 134 pro.
Qeveria e Yingluck po përballet me demonstratat më të mëdha që kanë goditur Tajlandën që prej dhunës së vitit 2010.
Sekretari i Përgjithshëm i OKB-së, Ban Ki-moon, ka shprehur shqetësimin e tij mbi tensionet e krijuara, si dhe ka nxitur vetëpërmbajtje.
Protestat nisën në Bangkok të dielën, e që prej atëherë demonstruesit kanë bërë thirrje për dorëheqjen e qeverisë, duke marshuar drejt Ministrive dhe trupës qeveritare, në përpjekje për t’i mbyllur ato.
Protestuesit, të cilët udhëhiqen nga një ish-ligjvënës i partisë opozitare, thonë se qeveria e zonjës Yingluck është e kontrolluar nga vëllai i saj, një ish-lider i rrëzuar, Thaksin Shinawatra.
Zonja Yingluck ka kërkuar fuqi të posaçme që lejojnë shtetrrethimin dhe mbylljen e rrugëve, ndërsa policia ka urdhëruar gjithashtu arrestimin e liderit të protestave, por deri më tani asgjë nuk është bërë për kapjen e tij.
Lideri i OKB-së, Ban Ki-moon, ka bërë thirrje ndaj të gjitha palëve të “ushtrojnë një vetëpërmbajtje të madhe, të mos përdorin dhunën dhe të tregojnë respektin maksimal ndaj ligjeve dhe të drejtave të njeriut”.
Top Channel
