Skëndërbeu mori i vetëm kryesimin e Superligës, pasi mposhti lehtësisht Partizanin, në kryendeshjen e javës së dhjetë të zhvilluar në Korçë.
Kampionët në fuqi dominuan sfidën dhe realizuan dy herë me Pejiç e një herë me Ribaj, ndërsa Partizani arkivoi humbjen e tretë radhazi që pas suksesit në derbin me Tiranën.
Humbjet e njëpasnjëshme ndaj Vllaznisë, Lushnjës e Skëndërbeut, duket se ridimensionojnë objektivat e skuadrës së kuqe, që përfshihet, ashtu si ekipi tjetër kryeqytetas i Tiranës, në një krizë rezultatesh.
“Rokada” në krye të stolit të Tiranës nuk i ka shërbyer bardhebluve për të dalë nga situata e vështirë e klasifikimit, ndërsa bardheblutë morën një goditje të fortë më parë gjatë ditës, me humbjen e pësuar përballë Flamurtarit në “Selman Stërmasi”.
Në një ndeshje mes dy skuadrave në nevojë urgjente për pikë, vlonjatët u treguan më të saktë dhe vendosën gjithçka në pjesën e dytë të takimit, falë dygolëshit të Zeqirit, njëri prej të cilëve me penallti.
Nga ana e saj, Lushnja vazhdon të mbetet surpriza e këtij kampionati, ndërsa lagunarët kaluan edhe përmbi Besën e vendit të fundit, me një fitore minimale në shtëpi.
Mbyllin javën e dhjete dy takime të së dielës, Laçi-Kukësi dhe Vllaznia-Bylisi.
Java e dhjete
Të premten
Teuta-Kastrioti 1-2
Të shtunën
Tirana-Flamurtari 0-2
Lushnja-Besa 1-0
Skëndërbeu-Partizani 3-0
Të dielën
Laçi-Kukësi
Vllaznia-Bylisi
Renditja
Pikë Skuadra
22 Skëndërbeu
19 Teuta
16 Vllaznia
15 Lushnja
14 Partizani
13 Laçi
12 Kastrioti
11 Flamurtari
10 Bylis
10 Tirana
9 Kukësi
8 Besa
Top Channel