Mbërrin kombëtarja e Zvicrës

Sigurisht që, vëmendja më e madhe e mediave tona është përqendruar te futbollistët shqiptarë, që aktivizohen në këtë skuadër. I vetmi, që nuk ka pranuar të flasë para ndeshjes, ka qenë futbollisti i Bayern Munich, Xherdan Shaqiri.

“Nuk guxoj të flas përpara lojës”, ishin fjalët e vetme të yllit të bavarezëve, Shaqiri.

“Jo aspak, ndoshta të premten, përpara lojës po”, u shpreh Granit Xhaka, i pyetur nëse ishte i emocionuar që kishte mbërritur të luante si kundërshtar i kuqezinjve tanë.

“Është një ndeshje normale, si gjithë të tjerat kur luhet futboll”, deklaroi Valon Behrami.

Një ditë më parë, Tifozët Kuqezi u bën thirrje futbollistëve shqiptarë të Zvicrës, që të mos aktivizohen në ndeshjen e së premtes, por Behrami ka pohuar se puna dhe ndjenjat janë dy gjëra krejt të ndryshme.

“Nuk e di, e kemi parë në Zvicër se si jemi pritur, tani të shohim se çfarë na kanë përgatitur këtu”, shtoi më tej Xhaka.

“Përse të mos luajmë? Është vetëm futboll, tjetër gjë është jeta, tjetër gjë futbolli, tek e fundit është vetëm një lojë”, deklaroi Behrami.

Edhe pse i mjafton 1 pikë për t’u kualifikuar për në botërorin “Brazil 2014”, Xhemajli pohon se skuadra helvete ka ardhur për fitore në kryeqytetin shqiptar.

“Po, neve na duhet vetëm 1 pikë, por unë do të luaj si çdo herë për fitore. Është normale që të gjithë të luajmë për fitore”, tha Xhemajli.

Top Channel