Shumë gola të pësuar, Buffon: Faji im

Kjo është një situatë e pazakontë për bardhezinjtë, të paktën në dy-tre vitet e fundit, por edhe e besdishme, sepse sic thotë portieri dhe kapiteni i bardhezinjëve, është më komode kur skuadra kalon e para në avantazh.

“Në 3-4 ndeshjet e fundit në goditjen e parë të kundërshtarëve kemi pësuar gol. Shkaqet janë të shumta, që nga fati e deri tek disa gabime në repartin mbrojtës, përfshirë gabime të miat. Por meqë jemi në nisje të sezonit, kjo pranohet por duhet të rikthehemi në gjendjen tonë optimale, si vitin e kaluar për të qenë konkurentë”, deklaroi Buffon për mikrofonat e Sky Sport.

Numri një i bardhezinjëve komentoi edhe situatën e Pirlos.

“Një lojtar si Andrea nuk mund të diskutohet asnjëherë, përndryshe shkatërrojmë stadiumet, i bëjmë copë e çikë dhe rikthehemi në shtëpi e të mos luajmë më futboll. Shpresoj skuadra të mos privojë veten nga një forcë e tillë në mesfushë”, tha Buffon.

Dhe në fakt ky është edhe mendimi i drejtuesve të Juventusit, të paktën njërit prej tyre. John Elkan, presidenti i Fiat që siguroi tërthorazi tifozët juventinë.

“Pirlo është një futbollist i madh, skuadra është përforcuar goxha dhe objektivi është ta mbajmë kështu”, tha ai.

Top Channel