Champions, Milan shkatërron PSV-në

28/08/2013 23:55

Milan, Zenit St Petersburg, Celtic Glasgow, Real Sociedad dhe Victoria Plzen plotësojnë skuadrat që do të marrin pjesë në fazën e grupeve të Champions League.

Ekipi italian i drejtuar nga Allegri nuk gaboi në “San Siro” dhe mposhti 3-0 PSV Eindhoven, falë një dopiete të Kevin Prince Boateng dhe golit të Balotelli-t.

Një tjetër protagonist i fitores së skuadrës italiane ishte dhe portieri Abbiati, pritjet e të cilit i dhanë më shumë kurajo skuadrës për të shkuar drejt kualifikimit.

Celtic bëri mrekullinë në fund, duke përmbysur humbjen 2-0 të ndeshjes së parë me Shakhtar Karagandy. Skocezët fituan 3-0 ndaj skuadrës kazake, falë golave të Commons, në pjesën e parë dhe Samaras e Forrest, në të dytën.

Çekët e Victoria Plzen, të cilët e kishin siguruar kualifikimin që në ndeshjen e parë, fituan edhe të dytën ndaj Maribor, këtë herë me rezultatin 1-0. Ndërkohë, dopieta e Carlos Vela ka shuar shpresat e pakta të skuadrës së Lyon, për pjesëmarrje në Champions.

Spanjollët e Real Sociedad mundën skuadrën franceze, me po të njëjtin rezultat që fituan edhe 1 javë më parë.

Zeniti i Luciano Spalletti-t e pati të lehtë të mposhtte edhe në Rusi portugezët e Pacos de Ferreira. Rezultati i sfidës së kthimit ishte 4-2, ndërsa ai përfundimtari 8-3.

Shorti i grupeve të Champions League do të hidhet ditën e enjte dhe do të transmetohet drejtpërdrejt në Supersport 2, në orën 17:45.