Zgjedhjet e pjesshme vendore

Ky dekret, që përcaktoi se votuesit e Bulqizës, njësisë bashkiake numër 1 në Tiranë dhe komunës Thumane në Krujë do të votojnë në të njëjtën ditë për parlamentin e ri dhe për të zgjedhur drejtuesit e rinj vendorë, ndër të tjera nuk i lë afat as KQZ-së, qoftë edhe për të printuar fletët e votimit.

Për opozitën, publikimi i dekretit të kësaj date nga presidenti ditën e premte më 31 maj shoqërohet me paqartësinë e respektimit të afateve ligjore të përcaktuara në Kodin Zgjedhor, në nenin 10 të tij.

E kontaktuar nga Top Channel, Presidenca nuk u përgjigj se kur është njoftuar për dorëheqjen e drejtuesve vendorë nga Këshilli i Ministrave dhe nëse ka zbatuar afatin 48-ditor që kodi i përcakton presidentit për të dekretuar datën e zgjedhjeve.

Kjo bën që sipas llogarive të ligjit, kandidatëve iu mbeten vetëm shtatë ditë fushatë, duke krijuar preçedentin e fushatës zgjedhore më të shkurtër në historinë e zgjedhjeve shqiptare.

Genc Gjonçaj, PS: Kur është njoftuar presidenti?

Lefteri Lleshi, kryetare e KQZ: S’është detyra jonë ta dimë këtë.

Gjonçaj: Duhet ta dimë. Si iu është lënë kaq afat kandidatëve? Kur është bërë kjo ndonjëherë?

Lleshi: Pavarësisht afatit, kandidatët janë në kushte të barabarta.

Mes debatesh KQZ miratoi aktin për “pasqyrimin e fushatës zgjedhore në radio/televizionet private të vëna në dispozicion nga subjektet zgjedhore”.

Ndërsa përfaqësuesi i PS kërkoi që KQZ të miratojë një udhëzim ku mediave t’u lihet e drejta e refuzimit të materialeve të përpunuara, vendimi i marrë nga katër anëtarët e rrëzoi këtë propozim.

Top Channel