KQZ, Berisha kundër Arvizu

Zoti Berisha ka qënë i ashpër në përgjigjen e tij, gjatë bashkëbisedimit me gazetarët në Lushnjë, kur u pyet se si e ka kuptuar kryeministri deklarimin e ambasadorit Arvizu, si një formatim të KQZ-së, apo plotësim të vendeve vakante.

“Ligjet e Shqipërisë janë shumë të mira, unë dëgjoj me shumë respekt mendimet e miqve, por detyra ime është të zbatoj ligjin. Shqipëria ka institucione demokratike. Janë larg të qenit të përsosura, por nuk ka zëvendësim për to. Kur fillojnë të bëjnë gjykatësin kushtetues, gjykatësin e lartë apo të faktit, unë them se nuk respektojnë veten e tyre. Kushdoqoftë! Ky është shtet i bazuar në ligje. Askush nuk ka mandat të interpretojë ligjet e një vendi tjetër, apo të marrë atributet, sepse mënyra se si funksionojnë qeveritë e vendeve të lira është e mrekullueshme”, u shpreh Berisha.

Ndërkohë, Top Channel ka mësuar nga burime diplomatike se, në Tiranë, një ditë përpara mbërritjes së Jonathan Moore, ka mbërritur edhe Toni Podesta, president i “Podesta Group”, lobuesi në Washington i Berishës.

Nuk dihet nëse ardhja e Podestës lidhet me ardhjen e Moore dhe me deklaratat e fundit të kryeministrit, të cilat e fusin kursin e tij politik në një përplasje të hapur, tashmë,  me të dërguarin e presidentit Obama, në Tiranë, Aleksandër Arvizu.


Berisha: Projektet tona do të vazhdojnë

Kryeministri Sali Berisha ishte në Lushnjë, ku prezantoi kandidatët për deputetë. Në fjalën e tij përshëndetëse Berisha pati në fokus reformat e qeverisë në këto 8 vite.

Duke u ndalur tek investimet për rrugët, Berisha shigjetoi liderin e opozitës Edi Rama dhe premtoi se të tjera rrugë do të shtrohen gjatë mandatit të ardhshëm.

“Kemi shumë kilometra rrugë për të asfaltuar. Deri më tani kemi asfaltuar mbi 10 mijë kilometra dhe ne do të rregulllojmë rruga në cdo cep të Shqipërisë. Më 23 qershor të bashkohemi dhe të votojmë Partinë Demokratike, fitoren e madhe”, tha Berisha.

Top Channel