Hija e normalitetit në Damask

Lufta ka mbërritur në portat e Damaskut, por përvec sulmeve sporadike, asnjëherë nuk ka prekur zemrën e kryeqytetit sirian. Jeta këtu duket normale, një tjetër histori ku njerëzit ngrihen në mëngjes, shkojnë në punë  e rikthehen në mbrëmje të qetë, pavarësisht se vetëm pak kilometra larg dëgjohen të shtëna artilerie apo armësh të lehta.

BBC realizoi një dokumentar për Damaskun. I dërguari i këtij televizioni për Lindjen e Mesme, Jeremy Bowen thotë se qendra e Damaskut vazhdon jetën normale, kjo falë masave të siguruara nga regjimi që e ka shndërruar kryeqytetin në një bunker të vërtetë për të shmangur infiltrimin e rebelëve të armatosur.

Në qendër, një prej skuadrave të futbollit të kryeqytetit po zhvillon përgatitjet e fundit për takimin e radhës…

Kjo siguri e ky “normalitet” në Damask i ka kushtuar regjimit të presidentit Bashar al-Assad miliona dollarë dhe humbje të mëdha ushtarake, por megjithatë ai vazhdon të mbahet fort.

Për momentin, thotë BBC, rebelët nuk kanë fuqinë dhe organizimin të thyejnë mburojën e regjimit, ndërsa ky i fundit ka vendosur mijëra trupa këmbësore, artileri të rëndë dhe qindra tanke në cdo hyrje të qytetit.

Lufta në Siri, thotë korespondenti i BBC për Lindjen e Mesme, nuk është thjesht një cështje siriane, por e gjithë rajonit dhe e komunitetit ndërkombëtar. Ndërsa vende të ndryshme vazhdojnë të mbështesin me armë dhe forma të tjera anën e tyre të preferuar, ajo që mbetet për popullin sirian është dëshpërimi.

Banorët e Damaskut kanë humbur lidhjet me pjesët e tjera të vendit dhe kryeqyteti është shndërruar në një ishull të vogël të blinduar ku është shumë e vështirë të hysh dhe shumë herë më e vështirë të dalësh, thotë i dërguari i BBC.

Top Channel