Sport

FIFA kundër Pandev, publikon votën e tij

22/03/2013 00:00

Deklaratave dhe pretendimeve të kapitenit të Maqedonisë Goran Pandev për manipulim të votës së tij për trajnerin më të mirë të vitit 2012, FIFA iu kundërpërgjigj me publikimin e fletëvotimit të tij.

Pandev deklaroi se kishte votuar për Jose Mourinho-n, ndërkohë që pas publikimit vota shkoi për Vicente Del Bosque, i cili mori edhe titullin e trajnerit më të mirë të 2012-ës.

FIFA publikoi fletëvotimin e federatës maqedonase të futbollit ku shihet qartë vota e Goran Pandev për trajnerin më të mirë. I pari i përzgjedhur prej tij është pikërisht Del Bosque, ndërsa Mourinho nuk figuron askund, sepse i dyti është tekniku i Manchester City, Roberto Mancini dhe i treti Jurgen Klopp i Borusias së Dortmundit.

Fletëvotimi është firmosur në fund nga trajneri i kombëtares maqedonase, Cedomir Janevski dhe vetë Goran Pandev.

FIFA u vendos në qendër të kritikave pas zërave për manipulim të votimeve për ndarjen e cmimeve për vitin 2012. I pari që hodhi dyshimet ishte pikërisht trajneri i Realit të Madridit, Jose Mourinho. Portugezi bojkotoi ceremoninë duke e cilësuar atë false pasi cmimet ishte paracaktuar.

Top Channel