Kimi Raikkonen deklaroi të enjten, një ditë para fillimit të fundjavës së Cmimit të Madh të Australisë, garës së parë të Formulës 1 për vitin 2013, se nuk e sheh veten si favorit për fitoren e titullit kampion edhe pse vjet u paraqit shumë mirë me Lotusin e tij.
“E njoh më mirë skuderinë, por kjo nuk të sjell domosdoshmërisht rezultate më të mira. Do të jetë një sezon më i lehtë për mua në krahasim me vjet, por nuk premtoj rezultate më të mira, por premtoj vetëm se do të jap maksimumin”, u shpreh piloti finlandez.
Raikkonen shihet si një nga favoritët në luftën për titullin kampion, por kampioni i vitit 2007 deklaroi: “Nuk ka kuptim të flasësh për favoritë pa filluar sezoni. Pas 2-3 garash mund ta hapim këtë temë, por jo tani. Gjithashtu, kemi pasur disa probleme të vogla që na kanë marrë kohë gjatë testimeve.”
Gara e parë e sezonit të ri të Formulës 1 do të zhvillohet të dielën, në orën 07:00 me orën shqiptare.
Top Channel
