Barcelona “blindoi” Messin deri në qershor 2018, duke zgjatur kontratën me katër herë fituesin e Topit të Artë deri kur ai të jetë 31 vjeç.
Takimi i paralajmëruar në orën 16:30 për rinovimin, midis Messit dhe presidentit Rosell, u zgjidh në zyrat e “Camp Nou” brenda pak minutash, pasi marrëveshja mes të dyja palëve ishte e plotë.
Lajmërimi për rinovimin u publikua në faqen e internetit të vetë klubit, duke u përhapur me shpejtësi në të gjitha mediat ndërkombëtare.
25-vjeçari, i cili debutoi me Barçën në moshën 17-vjeçare, në vitin 2004, u pikas që 12 vjeç nga zbuluesit e talenteve të katalanasve në Argjentinë dhe u formua me skuadrat zinxhir te Barcelones, përpara se të mbërrinte deri tek ekipi i parë.
Në janar 2007, ai firmosi kontratën e parë madhore në “Camp Nou”, një marrëveshje 7-vjeçare, me klauzolë shitje prej 150 milionë eurosh.
Messi rinovoi më pas në 2011-n, deri në vitin 2016, por klubi dëshiroi të garantonte qëndrimin e tij edhe pas kësaj date, duke i ofruar një marrëveshje të re, që besohet se rrit pagën në nivelin midis 12-14 milionë eurove në sezon.
Me Barcelonën, Messi ka zhvilluar 236 ndeshje zyrtare e realizuar 203 gola, duke ndihmuar klubin që të fitojë pesë herë titullin kampion në Spanjë, tre herë Champions League, dy herë Botërorin e Klubeve, dy herë Kupën e Mbretit dhe tre herë Superkupën e Europës.
Top Channel
