Trashëgimia, jo më në gjykatë

“Propozojmë që të gjitha këto vendime gjyqësore të hiqen nga procedura gjyqësore dhe të gjitha t’i kalojnë noterit, bazuar kjo dhe në standardet e disa vendeve të BE-së. Së dyti edhe procesi i lëshimit të urdhërave të ekzekutimit është një proces i zgjatur. Mendoni, qytetarëve që pasi kanë kaluar 2 ose 3 vjet, gjyqë-fituesit i duhen sërish të përballet me gjykatën të paktën me katër hapa, pikërisht për të marrë urdhërin e ekzekutimit”, tha ministri Halimi.

Propozimi u mbështet edhe nga kryetarja e Gjykatës së Lartë Shpresa Beçaj.

“Do të lehtësonte ngarkesën e gjykatave nga numri i këtyre cështjeve që është numër i madh dhe që në vetvete nuk paraqet vështirësi për t’u realizuar nga noteri”, tha gjyqtarja Beçaj.

Gjithashtu në draft propozohet që për të shmangur zvarritjet e gjyqeve nga mungesa e palëve, qytetarët të njoftohen me mesazhe telefonike apo e-maile. Kryetarja e Gjykatës së Lartë shtoi se ndryshimi i mësipërm për njoftimin e palëve elektronikisht duhet të parashikohet si një mundësi dhe jo si domosdoshmëri, sikurse është shkruar në projektligj.

Kryegjyqtarja Beçaj u shpreh kundër edhe për heqjen e rishikimit të vendimit civil në mënyrë përfundimtare jo nga Gjykata e Lartë, por ajo e Apelit.

“Ne mendojmë se kompetenca e rishikimit të vendimit për shkak të natyrës së vecantë që ka, duhet t’i mbetet sërish Gjykatës së Lartë”, tha Kryetarja e Gjykatës së Lartë.

Në draft parashikohen penalitete edhe për rekurse formale që synojnë zvarritjen e proceseve.

Top Channel