![](https://top-channel.tv/wp-content/uploads/2024/06/bastoni_sd-800x450.jpg)
Pas dështimit të tratativave për rikthimin e Kakasë tek Milani, kuqezinjtë janë vënë në ndjekje të një tjetër veterani, të sulmuesit Didier Drogba.
Sipas “La Gazzetta dello Sport”, administratori i deleguar i klubit, Adriano Galliani, ka barazuar ofertën prej tetë milionë eurosh, që Juventusi i ofroi Shangait për kartonin e afrikanit dhe ka kontaktuar vetë futbollistin, për t’i komunikuar interesimin e klubit.
Aktualisht i grumbulluar me Bregun e Fildishtë për të marrë pjesë në Kupën e Kombeve të Afrikës në zhvillim, Drogba ende nuk ka vendosur për të ardhmen e tij, edhe pse është i vendosur që të rikthehet në Europë, pas përvojës së dështuar kineze.
I pyetur për mundësinë e blerjes së 34-vjeçarit, trajneri Allegri dha dritën jeshile për blerjen e tij.
”Nëse do të vijnë, kampionë të kalibrit të Drogbasë do të ishin të mirëpritur. Megjithatë, unë vazhdoj i qetë punën me futbollistët që kam, ndërkohë që klubi mendon për mënyrat se si mund të përmirësohet më tej ekipi”, deklaroi Allegri.
Top Channel