Samiti për buxhetin e BE, ende pa akord

Polonia dhe vendet fqinje të saj, ish-komuniste, duan që shpenzimet aktuale të ruhen në po të njëjtat nivele apo të rriten. Ata mbështeten së tepërmi në fondet e dhëna nga BE.

Negociatat në Bruksel do të vazhdojnë të premten, ndoshta edhe më tej. Presidenti i Francës, Francois Hollande, refuzoi propozimet për shkurtime të shpenzimeve në agrikulturë, duke thënë se “politika e përbashkët bujqësore nuk është politikë franceze, por europiane”.

Tradicionalisht, Franca ka qenë një prej përfitueseve më të mëdha nga mbështetja e BE-së për fermerët.

Kryeministri i Britanisë së Madhe, David Cameron, foli për rreth gjysmë ore me Presidentin e Këshillit të Europës, Herman van Rompuy, si dhe Presidentin e Komisionit Europian, Jose Manuel Barroso.

Një deklaratë e Downing Street pas mbledhjes, bënte të ditur se Cameron kishte theksuar rëndësinë për Britaninë, për shkurtimin e shpenzimeve me vlerë 3,56 miliardë euro në 2011-n. Deklarata e quante shkurtimin “plotësisht të justifikueshëm”.

Komisioni dhe disa qeveri të BE-së donin që të hiqej dorë nga ideja e shkurtimeve. Deklarata britanike shtonte se “ishte e qartë që do të duhej ende shumë kohë për të arritur një marrëveshje, që do të reflektonte vendimet e vështira të ndërmarra nga shtetet anëtare”.

Takimet bilaterale zgjatën më shumë nga sa ishte parashikuar, duke shtyrë nisjen zyrtare të samitit me 3 orë, teksa mbledhja filloi në 23:00.

Top Channel