Superliga, fiton Flamurtari e Teuta

17/11/2012 19:10

Flamurtari i shkaktoi humbjen e parë në këtë kampionat Kukësit, duke mposhtur ekipin verior me rezultatin 2-0, në ndeshjen e vlefshme për javën e 11-të të Superligës Shqiptare.

Vlonjatët e trajnerit Rubio bënë diferencën duke shënuar nga një herë në secilën pjesë, nëpërmjet kroatit Davor Bratiç dhe me penallti, me Migen Memellin.

Ndërsa, në “Niko Dovana” të Durrësit, Teuta siguroi një fitore të lehtë ndaj kundërshtarëve ballshiotë, Bylisit, të nënshtruar nga dygolëshi i Nikës dhe rrjeta e Xhafajt. Me këtë tripikësh, duke përfituar nga disfata e kuksianëve, durrsakët ngjiten në vendin e dytë, në kuotën e 20 pikëve.

Vazhdon paraqitja zhgënjyese e Tomorit të Beratit, që në shtëpi përsëri nuk arrin të gjejë fitoren e parë në këtë kampionat. Beratasit barazuan 1-1 me Luftëtarin e Gjirokastrës.

Ditën e nesërme, do të zhvillohen ndeshjet e tjera të Superligës, të cilat janë: Shkumbini-Laçi, Tirana-Apolonia, Kastrioti-Skëndërbeu dhe Besa-Vllaznia.

Kjo është renditja aktuale e Superligës Shqiptare
                       Ndeshje Pikë
1. Skëndërbeu       9      21
2. Teuta              11   20
3. Kukësi               10   18
4. Laçi                   10   17
5. Tirana               10   16
6. Flamurtari      10   15
7. Bylis                  11   15
8. Vllaznia             10   15
9. Besa                 10   15
10. Kastrioti           10   12
11. Luftatari          11   11
12. Shkumbini       10   7
13. Apolonia       10    5
14. Tomori            11   5