Barcelona fitoi 4-2 ndaj Mallorca falë dy golave të Messit, një goli me goditje dënimi të Xavi dhe një goli të Tello.
Edhe pse fitonin 0-3 në pjesën e parë, katalanasit lejuan që vendasit të shkurtonin në 2-3 diferencën para se Messi të vuloste ndeshjen me golin e katërt, gol që ishte historik pasi e lejoi të thyente rekordin e atij që konsiderohet si futbollisti më i mirë i të gjitha kohërave: Pele.
Argjentinasi i Barcelonës, me dy golat e së dielës arrin në kuotën e 76 golave në një vit kalendarik.
Në vitin 1958, Pele kishte arritur të shënonte 75 gola në ndeshjet zyrtare, por tashmë edhe ky rekord është thyer nga “Pleshti” i Barcelonës.
Messi ka shënuar 64 gola me katalanasit dhe 12 me Argjentinën.
Alvaro Morata shpëton Realin
Alvaro Morata ishte protagonisti kryesor në fitoren e vuajtur të Real Madrid në fushën e Levantes. Lojtari nga “kantera” u fut në lojë në minutën e 82 kur ndeshja ishte në barazim 1-1 dhe arriti të shënonte golin e fitores për skuadrën e Jose Mourinho pas një goditjeje dënimi të Xabi Alonso.
Pikërisht mesfushori spanjoll kishte humbur një 11-metërsh pak minuta më parë.
Më parë, Cristiano Ronaldo kishte kaluar në avantazh madrilenët në pjesën e parë, ndërsa Angel barazoi për vendasit në pjesën e dytë duke rrezikuar trepikëshin për Realin.
Top Channel